Brysamt vatn

Problemstillinga har gått fleire runder innom ulike politiske utval, sist i plan- og bygningsutvalet torsdag.

- Vi ber om at de tek stilling til fire problemstillingar, innleia økonomikonsulent Eivind Solberg frå administrasjonen.

Fekk ny forskrift

Han ønskja seg ei avklaring frå politisk hald på

• ny kommunal forskrift for vatn og avlaup
• nivået på tilkoplingsgebyret
• om ein ønskja å skille det kommunale VA-gebyret i ei fast abonnementsavgift og ei variabel avgift basert på forbruket
• gebyrstrukturen på årsgebyret

Det første punktet var ikkje vanskeleg å få politikarane med på. Dagens forskrift er utdatert med referansar til lovar som ikkje lenger gjeld, så å få oppdatert forskriften var ikkje vanskeleg.

Kvifor dela gebyret i to?

Det som derimot blei ei større nøtt å knekka for utvalet var korleis ein skal prissetta vassgebyret.

- Eg slit med å forstå kvifor administrasjonen ønskjer å splitta gebyret i to. Kva skilnad får det for meg som innbyggjar, undra Terje Sperrevik (TvS).

- Det er det som er den anbefalte løysinga frå Norsk Vann og den modellen stadig fleire kommunar legg seg på, forklarte Solberg.

- I tillegg er det ein viss logikk i det at vi tek eitt gebyr for å føra vatnet fram til huset (abonnementsavgifta, journ.mrk) og eitt gebyr basert på husstanden sitt forbruk, supplerte kommunalsjef Karl Ole Midtbø.

Pris etter bustadstørrelse

Administrasjonen hadde sett for seg ein modell kor ein legg bustadstørrelsen til grunn for det variable gebyret og ei prissetting per kvaderatmeter.

Solberg presenterte ein illustrasjon for å synleggjere konsekvensane for det einskilde husveret (sjå bilete til høgre) kor det kom fram at dei minste bustadane vil få ei lågare avgift, medan dei største husvera vil få ei auke om ein vel den nye modellen.

- Alternativet vil vera å montera vatnmålar om ein meiner ein får eit for høgt stipulert forbruk, forklarte Solberg som fekk støtte av Lasse Færøvik (Frp) på at vatnmålar var den einaste rettferdige målemetoden og at ein kanskje skulle stille krav om installering av vatnmålar i alle nybygg.

Sjølv om administrasjonen ønska seg ei splitting av gebyret fekk dei ikkje politikarane med seg. Konklusjonen blei at utvalet vil helde på dagens ordning kor gebyret følgje ein trappetrinnsmodell. Berre Senterpartiet ville ha ny ordning kor ein betalar for forbruket.

Utbyggarane ønskjer endring

Det andre punktet administrasjonen ønska politikarane si meining om var kor mykje skal det kosta å kobla seg på det offentlege vatn- og avlaupsnettet.

- I dag er det eit forholdstal på 10:1 med utgangspunkt i årsgebyret. I tillegg nyttar vi ein tre-trinnsmodell i staden for to-trinn som på årsgebyret, fortalde Solberg.

- Os kommune ligg høgt samenlikna med kommunane rundt oss, noko utbyggarar som driv i fleire kommunar har reagert på.

- Argumenta deira går på at det byggast fleire kombinasjonsbustader og at kommunen sin kostnad med å legge fram vatn og avlaup til ti bustader ikkje skil seg vesentleg frå å leggja fram til ein eller to, supplerte Midtbø.

- Eg er veldig for dagens modell, slo Ståle Skaatun fast før han argumenterte med at dei som allerede bur i Os synest å vera nøgd med løysinga.

- Der er det jammen ein tendens til at Ståle og eg er einige. Eg er lysten på at vi skal helde på 10:1, slo Terje Sperrevik fast.

- Spørsmålet er om vi kunne ha differensiert trappa enno meir. Arbeiderpartiet ønskjer å byggje billige bustader. Små bustader kunne dermed gitt eit mindre tilkoblingsgebyr, meinte Harald Døsen (Ap).

Også på dette området konkluderte politikarane med at dei ville helde fast på dagens ordning. Endeleg vedtak skal fattast av kommunestyret 30. oktober.