Bygger stort på Sotra

Medan Os Turn og Os kommune diskuterer val og løysingar for utvidingar med ny bane på Kuventræ og hall nummer tre i Osbygda har dei kome nokre steg lengre på Sotra.

Fjell kommune og Sotra Sportsklubb har i Straume idrettspark allereie tre kunstgrasbanar utandørs. I tillegg kjem dette:

Fleirbrukshall
– 9.200 kvm med tre handballbanar.
Pris: 170 millionar kroner
Finansiering: Sotra SK 25 mill, Fjell kommune 90 mill og spelemidlar/mva ref ca 55 mill.
Ferdig: April 2013

Fotballhall
– 9.300 kvadratmeter med klatrevegg og 60x90 m fotballbane.
Pris: 55 millionar kroner.
Finansiering: Sotra SK
Ferdig: Før vinteren 2013/2014

• Begge hallane får møte- og kursrom, kontor, kafé, publikumsområde og fleire garderobar. Hallane kan også brukast til konsertar og messer.

• Straume idrettspark ligg på eit område på rundt 300 mål, 5 minutt frå Sartor Senter og kort veg frå Straume industrikai. Hurtigbåt frå Bergen sentrum eller Flesland tar 15/10 minutt.

• Rundt vatnet like ved anlegget er det teikna inn turløype. I den eine enden av vatnet skal det leggast ut sandstrand.

– Godt i gang

Det er fire år sidan idrettslaga Øygard, Foldnes og Brattholmen slo seg saman til Sotra SK. Det er på og rundt Øygard sitt anlegg at dei no utvider kraftig.

– I fjor la vi om frå gras til kunstgras på den gamle banen, og firedobla med det treningstid-kapasiten. Ved sidan av den 10 år gamle kunstgrasbanen utvida vi i år ein minibane til 11-arbane med nytt kunstgras, fortel dagleg leiar i Sotra sportsklubb, Dan Christensen.

Fleirbrukshallen er under bygging og skal vera ferdig i april 2013. Sandstranda i Skogvatnet kom på plass på seinsommaren.

Fotballhallen, som blir den første 11-arbanen i bergensområdet under tak etter Vestlandshallen, er nettopp ferdigfinansiert. Den får byggestart til våren og skal stå klar før vinteren 2013-2014.

Starta med sal av klubblokale

Den nye, store sportsklubben på Sotra hadde for liten kapasitet med eksisterande banar og Bildøyhallen. Klubben eigde anlegget på Straume sjølv, med tilhøyrande klubbhus, og sal av dette huset gav klubben ein viktig grunnkapital.

– Danielsen privatgymnas kjøpte lokalet. Seinare har viktig samarbeid med Fjell kommune og enkelte lokale bedrifter vore medverkande til at vi kan realisera dette.

Sartor Maskin og Trond Mohn har vore svært viktige støttespelarar for klubben.

– Men også kommunen, som vi har eit strålande samarbeid med, og medlemmane og deira foreldre. Det er ikkje lite dugnad som må til for å få til noko sånt.

Klubben har sikra seg ei tomt på 230 mål og har teikna inn endå fleire banar.

– Prosjektet vi held på med nok kjem til å bli eit stort løft for idretten i området, men vi har samtidig sikra oss at vi kan utvida yttarlegare i same område i framtida, seier Christensen.

– Eg er heldig som for lov å bidra

Blant dei som gjer ein stor innsats for Sotra SK er den pensjonerte og prislønna fotballtrenaren Aage Formo. Formo har vore landslagsspelar og landslagstrenar i bandy før han utdanna seg som fotballtrenar.

Han har trent ei lang rekke klubbar, dei fleste til eit eller fleire opprykk, blant anna tok han Mjøndalen heilt opp til eliteserien før han tidleg på 90-talet trente Os i 1. og 2. divisjon.

– Eg har vore heldig som har fått vera med på så mykje interessant, og som har fått oppleva så mange opprykk og fått fleire fine prisar, seier Aage, som budde i Os fram til for 10 år sidan.

– Og eg er heldig som framleis får gjera nytte for meg i eit sportsleg miljø som betyr så mykje for så mange, seier mannen som fyller 79 år i haust.

Kvar morgon i 7-tida, også laurdagar og søndagar, går han til Straume idrettspark for å rydda bane, vaska garderobar og gjera klart til at leiarar, trenarar og spelarar skal koma til gode treningsforhold.

– Som trenar opplevde eg at det å ha spelarane i fokus var viktigaste suksessfaktor, å koma tidleg og vera godt førebudd.

Fin gåve frå Os

Formo har fått ei rekkje prisar frå 1965 og fram til 2010.

– Ei av dei finaste merksemdene eg har fått var då Leif Bjarne Bøyum kom ut til meg på Sotra med gåve frå Os Turn på 70-årsdagen min for snart 9 år sidan, mange år etter at eg slutta i klubben.

– Det var veldig fint gjort av ei flott eldsjel som verkeleg gjorde alt han kunne for sitt idrettslag, seier Aage om Leif Bjarne.

Fjell kommune har 22.700 innbyggarar, Sund 6.400 og Øygarden 4.400. I tillegg til Sotra SK har kommunane idrettslag som Nest-Sotra og Nore Fjell, som framleis er eigne klubbar. Til samanlikning har Os cirka 18.000 innbyggarar.