Bygger'n vil tilbake til Os

Bildeserie:

Full skjerm

1 av 2

E A Smith AS, som blant anna eig Bygger'n-kjeda og Hiba Hus, har søkt Os kommune om rammeløyve i Industrivegen.

På ei 4,9 mål stor tomt, som dei etter det Midtsiden kjenner til har skrive leigekontrakt på, vil E. A. Smith AS bygga butikk og trelast med ei grunnflate på 1400 kvadratmeter.

– Det stemmer at vi ønskjer å etablera oss i Os, seier administrerande direktør i E. A. Smith AS, Christina Kjeldsberg.

Framdrift og kor tid dei har mål om å opna, kan ho førebels ikkje seia noko om.

– Det er for tidleg å seia. Men vi håper å veta meir i løpet av dei to neste vekene.

Var i Os i 13 år

I slutten av 2011, etter 13 år som Bygger'n-butikk, valte Os Byggsenter AS å gå over til XL Bygg-kjeda, gjeldande frå mars året etter.

Os Byggsenter, som i haust blei selt til Montér-eigar Optimera, hadde då vore i Bygger'n-kjeda i 13 år.

Frå 2005 til 2007 auka Os Byggsenter, som Bygger'n, frå 35 til 62 millionar kroner i omsetnad. I 2011, i sitt siste år som Bygger'n-butikk var omsetnaden på 55 millionar kroner.

Butikk, trelast og utandørs lager

I sin søknad om rammeløyve ber E. A. Smith AS om å få bygga eit næringsbygg på to etasjar med fotavtrykk på 1400 kvadratmeter.

I tillegg kjem parkeringsplassar og inngjerda, utandørs lager.

Søkjar har plan om todelt inn- og utkjøring, der kundar og tilsette kjører inn i nordre hjørne av tomta og ut i sør.

I tillegg til Montér blir Bygger'n, om etableringa går i orden, nabo med Flåten Bygg AS i Industrivegen.

Om Bygger'n:

Bygger'n er ein landsdekkande byggevarekjede med cirka 100 butikkmedlemmar frå Kristiansand i sør til Vadsø i nord.

Kjedekontoret blei etablert i 1991.

Samla omsetnad i 2012, i sisteledd, var på 3,9 milliardar kroner.

Bygger'n Norge, kjedekontoret, er eigd av E. A. Smith AS.