Dukkemakeren, Oseana (2012)

Dans supplert med film

SJÅ TRAILER, DUKKEMANNEN: Danselærar Patricia Langeland er både produsent og regissør i framsyninga 120 elevar frå Os Kulturskule serverer i Oseana i juni.

Av: Kjetil Vasby Bruarøy

Fredag 15. og laurdag 16. juni skal Os Kulturskule visa Dukkemannen i Oseana. Dette er ei danseframsyning i hybrid-oppsetjing med fleire innslag av film som del av dansen.

– Vi filmar det som ikkje lét seg skapa på scenen. Blir det gjort på rett måte er det betre å ta skogen inn i Oseana via film enn ved å bygga kulissar, seier danselærar og produsent Patricia Langeland.

I helga var det filming i Os, i Tellevika laurdag ettermiddag og i Os sentrum søndag på dagtid.

120 elevar i sving

Patricia har lang fartstid som danselærar ved kulturskulen og ho har fått med seg ein av hennar beste elevar, Julie Agate Erstad Bergesen som no går på danseakademi i London, til å laga koreografien.

– 120 av dei 150 elevane mine er med i framsyninga. Dansarar og skodespelarar frå 10 til 25 år er med.

Mange av desse var med på filminnspelinga i helga, der skogsborna blei filma ved Tellevika og dei meir urbane skeptikarane blei filma rundt rådhuset.

Ein fanga dukkemakar

Det er 5-6 år sidan Patricia viste første eigenproduserte framsyning, "Det grå regnbogetrollet". "Dukkemakeren" er den andre framsyninga ho har manus på.

– Dukkemakeren handlar om ein dukkemakar som er fanga av det han sjølv har skapt, dukkene sine. Dukkene, skogsbarna og skeptikarane kjempar om å få innflyting på dukkemakaren, og ei lita jente prøver å hjelpa han til å bli fri.

– Om dukkemakaren er fanga er ikkje dette ei tradisjonell handling, med det onde mot det gode. Dukkemakaren er fanga, ikkje av ondskap, men av eige behov.

– Dansen er viktigast

– Handlinga vil nok bli oppfatta på ulik måte av ungar og vaksne, og alle treng ikkje forstå handlinga frå A til Å for å ha utbyte av framsyninga.

– Dansen er viktigare og det blir mykje dans og fleire dansesjangrar representert, seier Patricia.

Sonen Benjamin Langeland står for foto, men er også framfor kamera og speler dukkemakar. Han har med seg Øyvind Svanes Lunde bak kamera.

Ingrid Rosvold er ballerina og speler jenta som vil hjelpa dukkemakararen.

VIDEO: Her kan du sjå ein kort teaser av hybrid-oppsetjinga. (Foto: Benjamin Langeland/Øyvind Svanes Lunde)

 

Fleire saker