Den første bølgebrytaren blir no bestilt

Bildeserie:

1 av 1

I kommunestyret i desember gav politikarane 21 millionar kroner til å skjerma hamna og etablera bubilparkering på Haugsneset. I møtet med næringslivet i Oseana i dag fortel ordførar Terje Søviknes (Frp) og prosjektsjef i kommunen Tor Inge Døsen om status for planane.

– Vi legg no ut to anbod, eitt på bygging av sjølve bølgjebrytarane og eitt på festing av desse.

– Begge delar er ein eigen vitenskap, fortel Søviknes.

Har lært frå sist

Bølgebrytarar er allerie prøvd ut i forsøk på å dempa fjorden i delar av Os hamn, innanfor den nye moloen, utan at det var særleg vellykka.

– Vi kjem ikkje til å nytta lenka løysningar som sist. Kvar av dei fire bølgjebrytarane skal vera i eitt stykke.

– Om det blir ei betongløysing eller ei løysing med ei stålkonstruksjon blir opp til dei som leverer tilbod.

– Dessutan blir det denne gongen reine bølgebrytarar og ikkje kombinasjonsløysingar med brygge.

Urealistisk å nytta stein

Fleire har tatt til orde for å nytta sprengstein frå tunellane på E39 eller frå OHARA, men den løysinga er forkasta.

– Det blir rett og slett for mykje masse som må til. Det er 50-60 meter djupt i delar av hamna, så det er nok ikkje ei realistisk løysing.

– Dessuten vil ei slik løysing kunne påvirka oppgangen av laks i elva.

– Den løysinga vi no vel vil truleg ikkje påverka laksen i det heile tatt.

Kapteinar som rådgjevarar

Kommunen har, i tillegg til å nytta Akvasafe AS som konsulent for bølgje-, forankringsanalyse og dimensjonering, bedt erfarne sjøfolk om råd.

– Vi har mellom anna snakka med begge kapteinane på Statsraad Lehmkuhl.

– Dei seier at den løysinga vi legg opp til skal vera grei i forhold å navigera eit 100 meter langt skip til hamna.

Seglingsleia blir femti meter brei med opning mot sør.

– Vi vurderte òg andre innseglingar, men fann vel ut at det meste av båttrafikken kjem den vegen, fortel Søviknes.

Første på plass i oktober

Anboda vil gå ut no i mars/april, med forventning om at den første bølgjebrytaren leggast ut i oktober 2015. Dei tre siste vil koma i løpet av 2016/17.

– Truleg i 2016, seier Søviknes.

– Grunnen til at berre éin kjem i haust er mellom anna at den ligg innanfor hamneområdet, som vår eige byggesaksavdeling behandlar.

– Dei tre siste ligg i sjø, så der må vi gå ein litt meir omfattande søknadsrunde med fylkesmannen og kystverket, forklarar ordføraren.

Trur på attraktiv hamn

Ordføraren trur tiltaket vil vera med på å gjera Os hamn endå meir attraktiv for båtfolket.

– Når vi no får skjerma hamna kan vi ta opp konkurransen med dei andre båthamnene i Hordaland.

– Saman med «Liv på Øyro-prosjektet», næringslivet i sentrum, Oseana og Osfest så vil Osøyro bli ei attraktiv hamn å legga helgeturen til, trur ordføraren.