Den ukjende gangstien

Me ser i Os & Fusaposten 5. september at Gustav Bahus veit om ein gamal sti under Hatvikvegen på Bø. Den har me som bur her ALDRI sett og heller aldri hørt snakk om. Under brua går det verken veg eller sti, men der renn ein bekk – og elles er der bare buskar. Kanskje på tida for Bahus å sleppa brillene ned på nasen og sjå etter ein gong til?

Diverre er ikkje ideen ny heller. Den var med i forslaget frå arkitektkontoret til vegkontoret då dei laga plan om gang- og sykkelveg langs Hatvikvegen for eit par år sidan. Meininga var at dei som bur på oppsida langs vegen, kunne gå under brua for så å svinga oppatt på gangvegen som skulle gå på sørsida av Hatvikvegen. Det var også tegna inn ein avstikkar ned til Midtbøvegen.

Har medlemmane i Plan- og bygingsutvalet sett desse tegningane?

Dette skulle gjerast når gang- og sykkelvegen kom så langt inn på Bøflaten. Andre løysingar har aldri vore diskutert med grunneigarane.

Etter synfaringa gjentok Harald Døsen (Ap) det han, Siren Tømmerbakke (Sp) og Terje Sperrvik (TvS) tidlegare har sagt om at tidlegare vedtatte rekkefølgekrav framleis må gjelda. Dei vikarierande argumenta som Bahus meiner blir brukt, er det nok han sjølv som brukar for å komma seg unna sine tidlegare løfter.

Skal dei som lovar mest og held minst fortsetta å styra Osbygda?

GODT VAL!

Hallgeir, Bjørg og Alf Strønen
grunneigarar på oppsida av brua