- Det blei for mykje

I halvanna år har søstrene Lena Stigen Mathisen og Mona Stigen, saman med mann og svoger, drive klesbutikken LOL på Osøyro. No har dei bestemt seg for å avvikla butikken.

- Det er tøft å driva butikk og vanskeleg å få det til å gå rundt.

- Vi har eigentleg andre jobbar som hovudgesjeft, så då vi såg at drifta ikkje var slik at vi kunne ha fulltidstilsette fann vi ut at det beste var å gje seg, fortel Lena Stigen Mathisen.

- Det er trist

Mathisen presiserer at dei kunne ha halde fram drifta, men innrømmer at lysta ikkje er stor nok til å ofra det som må til.

- Det er supertrist å gjera dette.

- Vi trudde og meinte at Os hadde brukt for ein butikk med ungdomsklede for både ungdomar og unge vaksne, men responsen har ikkje vore den vi håpte på.

- Samtidig har vi hatt mange gode og faste kundar som har brukt oss jamnt. Dei må eg få lov til å takka, smilar Mathisen.

Bruk lokale leverandørar

Sjølv om dei no gjev seg som butikkdrivarar har Mathisen ei klar oppmoding å koma med.

- No i desse juletider går det ei kampanje frå Norsk Gründerforum om å handla lokalt, anten det er i lokale butikkar, hos kunstnarar eller i lokalt drivne nettbutikkar.

- Eg kunne ikkje vore meir einig. Kvifor skal vi reisa til byen å handla, når vi får dei same varene på Os, spør ho retorisk.

Håper på triveleg julehandel

Planen er å halda LOL open fram til nyttår før dei avviklar drifta.

- Vi satsar på at mange osingar finn vegen til sentrum og innom oss for ein god julegåvehandel.

- Eg kan lova mange hyggelege prisar, seier Mathisen.

Ikkje parkeringa si skuld

Lena Stigen Mathisen sit òg i styret i Os sentrumsforening og er glødande oppteken av eit levande sentrum.

- Er det bråket rundt parkering og trafikkmønster som er grunnen til at de ikkje har lykkast?

- Nei, det er det ikkje. Parkeringa har blitt bra den, men det er klart at all støyen som har vore rundt det ikkje har vore positivt for oss om driv verksemder i sentrum. Men no følar eg at ting har falt på plass.

- Det er vel meir at klesbransjen er ein tøff bransje, og vi lykkast ikkje med å nå ut til potensielle kundar i stor nok grad, sjølv om eg synes vi har vore med på ein del aktivitetar og fått vist oss godt fram, avsluttar Lena Stigen Mathisen.