– Det er ikkje så lett å finna juletre lenger
Årets julegran i Os sentrum er ei gåve frå Odd Hjertholm.
Bildeserie:
I dag blei årets julegran i Os sentrum sett på plass på torget.
– Treet blei felt i dag. Det er «sagførar» Siri (Berge) som står for fellinga, seier Bjørn Moberg frå teknisk eining om kollegaen sin.
Funnen under hjortejakt
Bjørn seier jakta på store juletre ikkje alltid er så enkel.
– Dei bør jo vera frittståande, at det er greiner på alle sider. Dette treet fann eg under hjortejakt i nærleiken av «Hydrawinch» (Rolls-Royce-fabrikken på Ulven som Os Maskinering no eig).
Grunneigar er Odd Hjertholm, og Hjertholm sa ja på strak arm då kommunen spurde om å få treet.
– Eg spurde om pris, men sidan det var til sentrum så ville han ikkje ha noko for det. Vi er takksame når folk viser sånn velvilje, seier Moberg.
– Om turgåarar som ser gode emne, vil merka seg kvar dei står og tipsa oss gjennom året, så hadde det òg vore til stor hjelp.
Skal tennast på fredag
Lysa på grana skal tennast etter fakkeltog, som for første gong startar på Oseana, fredag 1. desember.
Før den tid skal teknisk eining juksa litt.
– Vi skal retta grana litt opp, og så er det eit par greiner som blei skadd då treet gjekk i bakken. Men det er ingen problem, vi har boremaskin og skal få greinene på plass igjen i stamma.