– Det er kjempegøy!
Bjørnefjorden golfklubb med golfskule for sjuande året på rad.
Bildeserie:
Siste veka før skulestart kan vera ei utfordring til å få i hop for familiar som er ferdig med ferien og kor mor og far må tilbake på jobb. Dette var noko Bjørnefjorden golfklubb såg for sju år sidan då dei starta golfskule måndag til fredag.
– Skulen starta med frokost slik at elevane får i seg eit godt måltid før dei går ut på feltet.
– Det trur eg også dei føresette set pris på. Då kan dei levera ungane her tidleg, og vera på jobb omlag til rett tid, seier klubbkoordinator Nina Moore.
– Eg er ikkje så flink
På treningsfeltet yrar det av liv, med 32 elevar frå fem til tretten år. Trygt under tak på drivingrangen driv ei gruppe å trenar på å slå lange rette slag. Etter nær to timar med sammanhengande trening, ikkje berre på rangen, men òg på puttinggreenen og chippefeltet, så er det ikkje rart konsentrasjonen kanskje ikkje her heilt på topp.
– Eg er ikkje så flink, kjem det frå ei.
– Men det er kjempegøy likevel.
Små grupper
Elevane er delt inn i grupper, litt etter alder og litt etter kva ferdigheitsnivå dei er på.
– Vi har maks sju elevar i kvar gruppe.
– Gruppene blir leia av ein frå seniorgruppa vår og ein av juniorane våre.
– Juniorane viser og tek seg av dei tekniske tinga, medan seniorane sørgjer for at vi held den planen vi har lagt for økta, forklarar rektor, Ingebjørg Anna Klepsvik.
Grunnen til at dei har delt elevane inn i så små grupper er for enklare å klare å følgje opp kvar og ein.
Det sosiale viktig
I klubbhuset nærmar det seg lunsj, servert av ein driftig gjeng frå damegruppa i golfklubben.
– Dei fortalte nettopp at dei hadde summert opp dugnadstimane sine og kome fram til at det blir 34,5 timer på kvar i løpet av veka.
– Den frivillig innsatsen dei legg ned er uvurderlig.
– Damene på kjøkkenet har vore med heilt frå starten for sju år sidan.
– Det trur eg er med på å skapa ei ekstra tryggleik for ungane. Dei kjenner dei vaksne igjen frå år til år.
– Måltida, både frukosten og lunsjen, er ein viktig del av skulen. Det sosiale samværet rundt bordet er sentralt for oss.
– Ungane knytter venskapsbånd på tvers av både alder og kjøn, noko som eg trur styrkar dei også utanfor golfbanen, smiler Moore.
Sunt og næringsrikt
Moore fortel at dei legg stor vekt på å servera sund og næringsrik mat til elevane.
– I år har vi fått god støtte frå Lerøy som har kome med både laks og sushi.
– Det er kanskje litt overraskande, men sushi elska ungane. Ein av dei forskynte seg heile sju gonger, så at unger ikkje ét fisk er berre tull.
– Men vi må kosa oss òg. I morgon, torsdag, avsluttar vi skulen med grillparty kor òg dei føresatte er velkomen til å vera med, fortel klubbkoordinatoren.
Skal ta merke
Tilbake ute på banen fortel rektor Klepsvik at elevane får prøvd seg på dei fleste tinga innan golf.
– Men det er ein ting som går att gjennom heile skulen og det er sikkerheit på banen.
– Det å bli treft av ein golfball, eller ei kølle, kan gjera fryktelig vondt. Difor legg vi stor vekt på korleis ein skal oppføra seg.
– Den gjengen vi har hatt denne veke har vore eksemplariske, smilar ho.
– Vi har ikkje hatt nokre uhell, anna enn eit par vepsestikk.
Torsdag avsluttar elevane med å ta golfmerker, kor både teori, sikkerheit og ferdigheiter er del av oppgåva.