– Det går mot ny rekord
I fjor sette dei ny deltakarrekord, i år har NNIL meir enn dobbelt så mange førehandspåmeldte. – Bedriftsklassen har slått an, seier Tord Skogedal Lindén.
Liafjellet Opp har vore eit populært motbakkeløp i fleire år, og i fjor sette arrangørane deltakarrekord med 99 løparar.
Motbakkeløpet, som blir arrangert under Osmesso og Nore Neset Dagane, går av stabelen laurdag 22. september, med start for turmars klokka 10.30 og for konkurranseutøvarar klokka 12.
– Då vi kom til løpsdagen i fjor hadde vi berre 20 førehandspåmeldte, no har vi nesten 50, og det er framleis tre dagar igjen av førehandspåmeldinga, fortel Tord Skogedal Lindén frå Nore Neset idrettslag.
– Det ser ut til å bli størst auke i kvinneklassen, men det er førebels tidleg å seia, for det er nok framleis mange som kjem og melder seg på dagen før. Dessutan er førehandspåmeldinga open fram til og med fredag.
Bedrifter frå Bergen på prøvetur i Os
Nytt i år er premiering til beste bedrift, der dei tre beste tidene til deltakarar frå same firma er teljande.
– Dette ser ut til å ha frista fleire til å delta, vi har blant anna sju tilsette ved ein barnehage på Søreide som har meldt seg på. Dei har også vore på Os på treningstur i løypa, avslører Tord.
– Og eg ventar at fleire bedrifter skal koma. Forslaget om bedriftsklasse kom frå ein i arrangementskomiteen som representerer ei bedrift i Os, eg lurer på om ikkje det til og med er snakk om ein sportsbutikk. Eg reknar han stiller med eit sprekt lag, utfordrar Lindén.
Heile klassen i Osbadet?
Nokre skuleklassar frå Nore Neset er godt representert, men konkurransen om å bli den klassen som har flest deltakarar opp Liafjellet er førebels ikkje hard.
– Her handlar det ikkje om tid, men om gjennomføring. Og premien er fin, den klassen som har flest deltakarar vinn tur i Osbadet.
Med seeda start
NNIL har fått låna nytt tidtakingsystem med chip i år, noko som gjer at dei kan gå frå å sleppa ut deltakarane klassevis til å sleppa 1 og 1 eller 2 og 2 opp fjellet.
– Målet er at alle skal få springa i eige tempo. Dei som ber om å bli seeda vil få starta åleine, andre startar to og to. Så tar vi intervall og pausar i håp om å hindra at nokon blir springande i kø på veg til toppen.
– Til no er det berre i herreklassen vi har mottatt ønskje om seeding, men vi reknar med at det også kjem nokre kvinner med ambisjonar om god tid.
Løypa skal ikkje vera råka av anleggsarbeidet på tomta som skal husa ny ungdomsskule i Os.