Det går mot røysterekord i Bjørnafjorden

Heile 12,25 prosent av dei røysteføre i Bjørnafjorden kommune har allereie stemt.

Måndag 12. august starta den ordinære førehandsrøystinga. Då var det sett ny rekord med 207 som hadde stemt under tidlegstemminga.

– Det har gått jamt sidan vi opna den ordinære førehandsrøystinga. Held det fram den siste veka fram mot valet, så er eg rimeleg trygg på at vi kjem til å setja ein ny rekord i mengde førehandsrøyster, fortel Aina Haugland, ansvarleg for førehandsrøystinga i Bjørnafjorden kommune.

Ved lunsjtider fredag 30. august, ei veke før førehandsrøystinga blir avslutta, hadde 2.293 førehandsrøysta.

Dette er 12,25 prosent av dei 18.707 som er røysteføre i Bjørnafjorden kommune.

Tilsvarande tal for kommunevalet i 2015 var 17 prosent, men det var for heile førehandsrøysteperioden i dei to gamle kommunane til saman.

Den totale valdeltakinga i 2015 var på rundt 67 prosent i begge kommunane.

1.689 har stemt på Kommunetorget i Os, 249 har stemt i Kommunetunet i Eikelandsosen, 84 har stemt på institusjonar og skular i kommunen, 271 har gjeve si stemme i ein anna kommune eller frå utlandet.

Laurdagsope

– Skal vi setja rekord så må folk røysta. Håpet er jo at den høge førehandsrøystinga er eit signal om at det også blir høg total valdeltaking i år.

– Det kan vera verdt å minna om at vi har ope i morgon, laurdag, òg, frå 10 til 14. Om folk tenkt seg på Bondens Dag eller til Osøyro for å vera med på Politiets Dag, så er det berre å stikke innom Kommunetorget og gjera borgerplikta si samstundes. Det er også ope i Kommunetunet i Eikelandsosen i same periode.

Førehandsrøystinga går føre seg kvar kvardag i kommunetorget/-tunet si opningstid fram til fredag 6. september med langope onsdag 4. og torsdag 5. september.

– Då har vi ope fram til klokka 17. Bjørnafjordingane kan stemma i kva lokale dei vil, så er det osingar som er i Fusa eller fusingar som er i Os kan dei berre stikke innom og røysta der dei vil Dei treng ikkje gå i sin «gamle» kommune, avsluttar Haugland.

1.542 fleire stemmer å kjempa om

Til valet i 2015 var det til saman 17.165 med stemmerett i Fusa (2.915) og Os (14.250).

I år er det til saman 18.707 (per 7. august ifølgje SSB.no).

Det betyr at det er 1.542 fleire stemmer å kjempa om i år.

Til samanlikning er dette 350 fleire stemmer enn Høgre i Os fekk ved førre val, og like mange som alle partia i Fusa, utanom Senterpartiet, fekk til saman.

Valdeltakinga var på rundt 67 prosent i begge kommunane. Til saman kom det inn 11.475 stemmer i 2015 (1.962 + 9.513).

Om tilsvarandre prosent stiller opp ved årets val kjem det inn rundt 12.500 stemmer i år.

• Midtsiden samleside: Val 2019

Sånn var valresultata i 2015

Fusa kommunestyre - 21 medlemmer
Frp: 2 (246 stemmmer/12,6 %)
Høgre: 3 (293 stemmer/15 %)
KrF: 2 (190 stemmer/9,7 %)
Venstre: 1 (93 stemmer/4,8 %)
Sp: 6 (531 stemmer/27,2 %)
Ap: 6 (499 stemmer/25,6 %)
Uavhengig: 1

Ikkje i kommunestyret i dag:
SV: 56 stemmer/2,9 %
MDG: 41 stemmer/2,1 %

Valdeltaking 67,3 % (1.962 av 2.915 med stemmerett)

Os kommunestyre - 35 medlemmer
Frp: 14 (3.731 stemmer/39,5 %)
Høgre: 4 (1.156 stemmer/12,2 %)
KrF: 2 (418 stemmer/4,4 %)
Venstre: 2 (612 stemmer/6,5 %)
Sp: 2 (407 stemmer/4,3 %)
Ap: 7 (1.832 stemmer/19,4 %)
MDG: 2 (486 stemmer/5,1 %)
TvS: 2 (649 stemmer/6,9 %)

Ikkje i kommunestyret i dag:
SV: 163 stemmer/1,7 %

Valdeltaking 66,9 % (9.513 av 14.250 med stemmerett)