Sport | 27. feb. 2018

– Det kan bikka begge vegar

Høgdepunkt og medaljeoversikt: Sverre om formen etter OL - før VM og verdscupavsluttinga.

– Det kan bikka begge vegar
Sverre Lunde Pedersen hadde OL-gull og OL-bronse rundt halsen då han landa på Flesland i går. No jaktar han VM- og fleire verdscupmedaljar. (Foto: Kjetil Vasby Bruarøy)
Kjetil Vasby Bruarøy
Kjetil Vasby Bruarøytirsdag 27. feb. 2018 14:32

I går blei Sverre Lunde Pedersen og Sindre Henriksen tatt imot med stil på Flesland (sjå bildeserie og video).

– Det var ein fantastisk velkomst! seier Sverre, som reiste frå OL-byen til flyplassen klokka 03.30 lokal tid, og reiste via Helsinki og Oslo heim til Bergen.

– Eg vakna tidleg i dag, i 7-tida, men fekk sova litt på dei lengste flyturane og føler at formen er fin.

Ved sidan av bronse og gull i OL har Sverre tatt 4 individuelle medaljar i verdscupen og 2 medaljar i lagtempo.

No gjenstår VM allround i Amsterdam (Nederland) og verdscup 6 (avslutting) i Minsk (Kviterussland) to helger etter kvarandre.

Varmar kanskje opp i Stavanger

I 14-tida i dag sette han seg på sykkelen (innandørs) for ei lett restitusjonsøkt.

– Det blir lett trening denne veka. Laurdag reiser vi for å førebu oss til VM allround, seier Sverre til Midtsiden dagen derpå.

Turen skulle gått til Heerenveen for trening fram til VM allround utandørs i Amsterdam 9. til 11. mars, men no ligg den an til å gå til Stavanger.

– Det er litt vanskeleg å få treningstid på isen i Heerenveen, så det er mogleg at vi held oss innanlands nokre dagar til.

Sverre tok bronse i VM allround i 2015 og sølv i 2016.

Sven Kramer har vunne 9 av dei siste 11.

I VM allround går deltakarane i herreklassen alle dei fire distansane; 500, 1500, 5000 og 10.000 meter.

Kor lenge varer toppformen?

Det kunne knapt gått betre for Sverre i OL, der han opna med bronse, to tusendelar bak sølv på 5000 meter, og truleg berre var ein skade i isen (som førte til feilskjer) frå sølv på 1500 meter.

I lagtempo var han lokomotivet som drog Noreg inn til gull.

– Formen var fin kvar dag. Eg føler eg traff med formtoppen og hadde ingen dårlege dagar eller smerter mens eg var i Sør-Korea.

– Når du treff med ein formtopp, kva kan det bety for tida etterpå?

– Det kan bikka begge vegar, du kan halda formtoppen ei stund, eller du kan bli svekka. Eg føler eg har eit godt grunnlag, og at eg gjorde alt rett før OL. Eg kjem heim frå Korea i fin form og eg trur eg vil halda meg oppe ut sesongen.

– Eg plar dessutan vera god mot slutten av sesongen. I fjor var eg heilt sluttkøyrd både fysisk og mentalt, men klarte likevel å avslutta ein skuffande sesong med bronse i verdscupavsluttinga.

Høgdepunkta denne sesongen

Før Sverre går VM allround og sesongens siste verdscup kan han sjå tilbake på ein sesong med 6 verdscupmedaljar, personleg bestenotering, norsk rekord og tysk banerekord.

Her er høgdepunkta til Sverre til no denne sesongen:

• Kongepokal etter gull på 1500, 5000 og 10.000 meter i NM siste helga i oktober 2016.

• 3. plass på 5000 meter og 2. plass i lagtempo i verdscupopninga i Heerenveen 10. til 12. november.

• 1. plass på 5000 meter og ny personleg rekord på 10.000 meter (6. plass med tida 13.02.42) i andre verdscuprunde i Sørmarka Arena i Stavanger helga etter.

• 3. plass i lagtempo i verdscup 3 i Calgary første helga i desember.

• 5. plass, men ny norsk rekord (6.07,61) på 5000 meter i Salt Lake City 10. desember.

• 1. plass og ny banerekord (6.14,66) på 5000 meter og 2. plass på 1500 meter i sesongens femte verdscup i tyske Erfurt 19. - 21. januar.

• OL-gull i lagtempo i OL-bronse på 5000 meter i Pyeongchang i februar.

No gjenstår:
9.-11. mars: VM allround Amsterdam (utandørs)
16.-18. mars: Verdscup 6 (avslutting) i Minsk i Kviterussland.

Spennande? Vil du ha ukas høgdepunkt i innboksen?

Les meir om

Tilbod: 1 månad for 1 kr

No kan du lesa Midtsiden.no i 1 månad for kun 1 kr.

  • Tilgang til alt innhald
  • Utan bindingstid
  • Frå 145 kr/md.
Les meir og bestill

Abonnementet blir fornya kvar månad. Du kan seia opp kor tid du vil, og blir då ikkje belasta for neste periode.