– Det skal bli ein fest
Onsdag feirar Os barneskule 100 år med blant anna fire rektorar på plass. – Vi håper mange av dei tidlegare elevane kjem, seier rektor Beate Moberg.
Bildeserie:
I 1914 blei kviteskulen bygd i Giskavollen. Skulen skulle ligga nær prestegarden og tok over for den første skulestova som blei bygd i Klokkargarden i 1861.
Les òg: Os skule gjennom 100 år
– Feiringa onsdag frå 18 til 20 skal bli ein fest kor vi kombinerer korleis det var å gå på skulen for 100 år sidan, med korleis det er i dag.
– Vi har invitert bebuarar på mellom anna Luranetunet og Gamleheimshagen, som kanskje gjekk her i gamledagar, i tillegg til dagens elevar og deira foreldre og besteforeldre.
– Eg håper alle som har historia si på Os skule har lyst til å vera med på feiringa, seier rektor Beate Moberg.
Fire rektorar kjem
Dagens rektor gler seg spesielt til å få møta tre av forgjengarane sine.
– Arne Lunde, Kåre Eiken og Anne Fossberg Fristad kjem alle tre.
– Eg har inntrykk av at dei gler seg like mykje som meg til å treffa nye og gamle elevar og sjå korleis skulen er i dag.
Kor med 400 songarar
I skulegarden blir det leikar og aktivitetar frå skulen si 100 år lange historie.
– Elevane har øvd og lært seg aktivitetar for forskjellige periodar. Her kjem det til å bli aktivitetar som vi kjenner frå trivselslederprogrammet i dag, til den gode gamle linjegymnastikken.
– I tillegg skal alle elevane og dei tilsette samlast i eit 400 personar stort kor for å syngje nokre av dei kjente og kjære songane som har vore brukt opp gjennom åra.
– Eg reknar med at det er mange som kjenner att dei, og eg håper dei syng med.
Innreia gamal skulestue
I tillegg til aktivitetar, song, taler og overraskingar har elevane og skulen førebudd utstillingar forskjellige stadar på skulen.
– I andre høgda på Kviteskulen har vi innreiia det eine klasserommet som ei gamal skulestove.
– Der har vi òg laga ei utstilling med utstyr som har vore i bruk på skulen dei siste 100 åra.
– I kjellaren vil det vera ei utstilling som elevane har laga kor dei viser korleis kviteskulen ser ut med deira auge.
– I tillegg til det vil det vera både fotoutstilling og aktivitetar med sanitetsforeninga, husflidlaget og småfiskarlaget i den nyaste delen av skulen, så eg håpar folk tek seg tid til å sjå seg om.
– Ein kvar bursdagsfeiring må jo ha kaker, saft og kaffi, så vi riggar til kafé framfor sløydsalen, kor det òg vil vera underhaldning utover ettermiddagen, avsluttar Beate Moberg.