- Dette blir bra!
Sentrumsleiar Geir Amundsen strålar over dei nye infoskilta kommunen har fått. I løpet av ei vekes tid er dei på plass.
Kommunen har fått mykje kritikk for mangelfull informasjon rundt parkeringsreglane i Os sentrum. Ein av dei som har vore skarp i kritikken er leiar i sentrumsforeninga Geir Amundsen som i sommar tok saka i eigne hender.
Torsdag måtte han berre innom Loops i Telthuskvartalet for å ta dei nye velkomstskilta frå Os kommune nærare i augesyn.
- Dette blir knallbra, skryt Amundsen.
Seks skilt
Kåre Mongstad hjå Loops fortel at kommunen har bestilt seks skilt som no skal opp i løpet av kort tid.
- Det kjem skilt ved Kyrkjetunet, det gamle kommunehuset, på torget, framfor rådhuset, på gjestebrygga ved Essoen og borte ved Peppes/Kaien.
- Skiltet ved gjestebrygga vil også få informasjon til båtgjestane i hamna på litt sikt, forklarar Mongstad.
Framleis gratis å parkera
Amundsen har opplevd mykje rare utsagn knytt til parkeringa i sentrum.
- Ein ting er sikkert, det har alltid vore, og er framleis, gratis å parkera i sentrum. Du kan stå i både to, tre og åtte timar.
- Med parkeringsskiva du får gratis i alle butikkane, er det berre stille ho på klokkeslettet og handla i veg. Du slepp gå ut av bilen ein regnvêrsdag for å henta ein lapp på automat. Enklare kan det ikkje gjerast, slår sentrumsleiaren fast.
- No når vi får dei nye skilta på plass er eg sikker på at vi kan gå ein triveleg og parkeringsproblemfri julehandel i møte, avsluttar Geir Amundsen.