– Dette måtte berre hyllast!

Torsdag var årets første møte i Bjørnafjorden kommunestyre. Møtet blei gjennomført på Teams, og under behandling av nye barnehagevedtekter, mens kommunestyremedlem Atle Kvåle (Ap) heldt innlegg, tok Børge Lunde (H) opp ein gitar som han klimpra på.

Lunde hadde ikkje skrudd av lyden på eigen mikrofon, dermed fekk Kvåle eit akkompagnement.

– Eg plar ofte sitja å teikna mens eg er i lange videomøte, for å halda konsentrasjonen oppe. Denne gong klimpra eg litt på gitar, men det var verken meininga å uroa Kvåle eller å visa manglande respekt for det viktige møtet, sa Børge til Midtsiden tidlegare i dag.

Fleire leigetakarar i Gründerparken ser på heile hendinga med eit smil, og blei raskt einige om å laga sin versjon - som ein videohyllest til Børge Lunde og episoden.

– Vi kjenner oss sjølv igjen i dette som skjedde. Vi lever alle under spesielle tider, med heimekontor og uendelege digitale møte.

– Vi er alle saman vant med å multitaska under desse møtene, så at det skjer nokre uhell iblant, er heilt naturleg. Eg har sjølv bomma på mute-knappen og lirt av meg noko søl, seier Christoffer Kobbeltvedt.

Rasande festleg

Hovudpersonen sjølv blei oppringt av Kobbeltvedt, og fekk til slutt sjå den gøyale videohyllesten. Den vart ifølgje Kobbeltvedt godt mottatt.

– Heldigvis syntest Børge dette var rasande festleg. Dette er jo ein klassisk heimekontor-blunder, som er veldig lett å hamna i.

– Vi tenkte ganske kjapt at dette her må vi rett og slett hylla, og det gjekk ikkje lang tid frå idé til ferdig produksjon, humrar Kobbeltvedt.