– Dette vert frykteleg dyrt

Over lengre tid har det lege ein kvit båt på Halhjem fergekai. Den gikk ned for ca. éi veke sidan. Klokka 14:00 på laurdag mottok politiet melding om oljelekkasje frå denne båten. Politiet kjem til å anmelda båteigar etter forureiningsloven.

– Vi rykka ut saman med brannvesenet. Brannvesenet la ut lensar for å begrensa forureininga. Han har fått mange moglegheiter til å fjerna båten, og mange moglegheiter til å hindra den i å synka. Han har ikkje tatt det ansvaret. Når båten no hevast, vert det på hans eiga rekning, seier politibetjent Sindre Lekven Hallem.

Dyr rekning

Brannvesenet vil også truleg sende vedkomande rekning for sine utgifter. I tillegg kan han truleg venta seg eit førelegg frå politiet.

– Totalt vert dette frykteleg dyrt. Vi slit med at folk sleng frå seg båtar rundt i bygda vår. Det hadde vore betydeleg billigare for eigar å få ein kranbil til å køyre båten til vraking, seier Hallem.