Djervane i treningskamp

Bildeserie:

1 av 6

I slutten av august i år skreiv vi om amerikansk fotball i Os, det nystarta laget Os Wolverines arrangerte «tryout» for å få nok spelarar til å spela i serie allereie i 2010.

- Det kom 47 for å årøva ei trening, til saman har vi nok hatt rundt 60 innom. Ei stund var vi 37 på treningane, som var litt mange. No har vi 21-22 som trenar fast, nokre få med erfaring, resten heilt ferske, seier trenar Christian Detjen.

SJÅ FLEIRE BILDE OG EIN LITEN VIDEOSNUTT NEDERST
(Sjå også 36 bilde frå kampen på Facebook-profilen Midtsiden No)

Han er kjempenøgd med både menga spelarar, nivået på treningane, samarbeidet med Bergen Storm og hjelpa han har fått av Os Turn.

- Vi har fått trenar frå Bergen Storm, så no er vi tre trenarar. Vi får også spela på deira lisens fram til vi får eigen. Og Os Turn har vore heilt fantastisk, i mi tid som trenar i Tyskland var eg aldri med på liknande støtte frå eit etablert idrettslag.

Uventa motstand
Laurdag spelte Os treningskamp mot eit Bergen Storm sett saman av spelarar frå junior- og seniornivå.

- Vi ger ofte dette nå serien er over, deler oss opp i grupper og trenar mot kvarandre, seier offensiv koordinator i Bergen Storm, Sondre Riisøen.

Eit stykke ut i kampen fekk vi ein kort prat med han igjen.

- Dei er gode, osingane, og gjev oss meir motstand enn vi hadde venta.

Bergen Storm vann 42-0, men osingane hadde fleire gode periodar både defensivt og offensivt.

- Vi er svært nøgd sjølv, og det var god stemning blant spelarane etter kampen. No er vi på Os Biljard & Sportsbar og ser kampen om igjen på storskjerm, seier Christian laurdag kveld.

Tidlegare NFL-spelar ser potensiale
Då Ryan Bethea kom til Noreg for å trena Bergen Storm sa Riisøen at det var som om David Beckham skulle koma til Vestlandet for å trena eit lilleputtlag.

Bethea har spelt for Minnesota Vikings og Pittsburgh Steelers i NFL, og han har rekordar frå High School-fotball som har stått i snart 25 år.

I dag var han på Kuventræ for å sjå treningskamp.

- Eg ser mange store gutar med hjarte for fotball. Dei manglar litt teknikk, men dette ser svært lovande ut, seier Bethea om det ferske laget frå Os.

Han meiner også at Detjen er ein god mann for eit nytt lag.

- Christian kan amerikansk fotball, og han er intens. Om ikkje du gjer som han seier, «or if you piss him off, he´s gonna kick your ass», seier Ryan Bethea.