Dobbelt bensintjuveri
To sjåførar i bilar med falske skilt stakk frå rekninga på Søfteland i løpet av 12 timar.
Tysdag kveld klokka 22 fekk politiet melding om at ein mørk Volvo hadde stukke av etter å ha fylt drivstoff på Er-An bensinstasjon på Røykenes.
- Onsdag morgon om lag klokka 8 fekk vi på ny melding om eit avstikk.
- Denne gongen var det føraren av ein BMW som ikkje gjorde opp for seg, fortel lensmann Rasmus Dalen.
- Begge bilane hadde kjennemerker som var stolne frå andre kjøretøy.
Stal skilta frå lastebil
Kjennemerka på den eine bilen var stolne frå ein lastebil heimehøyrande på Os.
- Då vi kontakta eigaren av lastebilen hadde dei ikkje registrert at merka var borte enno, seier Dalen.
Truleg er skilta stolne natt til torsdag eller torsdag morgon.
Mogleg samanheng
Lensmannen ser ikkje bort ifrå at dei to sakane kan ha ein samanheng og same gjerningsperson.
- Dette er definitivt nokon vi vil ha fatt i.
- Om det er personar som har sett dei to bilane køyre frå åstaden eller observert dei på veg til eller frå er vi interessert i tips, avsluttar Dalen.
Politiet på Os kan kontaktast på telefon 56 30 39 00.