Dømt for oppbevaring av 1,5 kilo amfetamin i Os

Ein mann i 30-åra frå Nederland er dømt for medverknad til oppbevaring av 1450 gram amfetamin.

Han kom til Noreg med buss frå Nederland til Oslo, vidare til Florø for å kjøpa amfetamin, så til Bergen for å møta ein potensiell kjøpar.

Ransaking av husvære i Os aust torsdag 4. oktober førte til det som er eit av dei største narkotikabeslaga i Os. Laurdag, to dagar seinare, blei det funne 0,3 gram hasj på ei anna adresse i Os aust. Sikta og ein kamerat blei pågripne på ein busshaldeplass i Os.

• Les òg: Tatt for smuglig av 5 kg amfetamin (2012)

Trudde han skulle få jobb

Sikta har samtykka til avgjerd ved tilståelsesdom. Han har forklart at han kom til Noreg fordi kameraten meinte han kunne skaffa han jobb på ein fiskebåt. Kameraten har budd i Noreg før.

På spørsmål om kvifor han heldt fram reisa, då han fekk veta at den handla om amfetamin, svarte sikta at «Det var jo kameraten min. Det var første gangen min i Noreg, eg visste ikkje kor eg skulle gå.»

Blei beden om å endra forklaringa si

Det er sikta som betalte for reise i Noreg, og hotellopphold. Kameraten som kjøpte amfetaminet hadde ikkje meir pengar, men skal ha sagt at han skulle betala tilbake.

Påtalemakta kom med forslag om fengsel i 2 år og 6 månadar. Det blei samanlikna med tilsvarande dommar, blant anna oppbevaring av 900 gram, som førte til fengsel i 2,5 år.

• Les òg: Dømt til 3 år og 4 månadar etter amfetaminbeslag (juni 2017)

Men retten meiner sikta ikkje har hatt ei sentral rolle, at hans medverknad var av meir underordna karakter. Han fekk dessutan rabatt for å tilstå.

Sikta fortalte at han i fengsel har blitt beden om å endra forklaringa si. Han blei ikkje fysisk truga, men blei psykisk dårleg, og blei flytta frå Bergen til varetekt i Vik.

Domfelte fekk 2 år og 1 månad fengsel. 168 dagar varetekt kom til frådrag.