Dømt for sal og oppbevaring

Det var onsdag 12. mai i fjor at politiet slo til mot eit husvære i Os. Ein mann i 40-åra blei arrestert, mistenkt for oppbevaring og sal av narkotika.

Politiet tok beslag i både kontantar og store mengder amfetamin/metamfetamin.

Av rettspapira går det fram at det blei tatt beslag i 523 gram amfetamin/metamfetamin og 110.000 kroner i kontantar.

Han skal i forkant ha kjøpt minst 850 gram amfetamin/metamfetamin og blei mistenkt og seinare sikta for sal ov minst 300 gram.

Mistenkte blei varetektsfengsla i til saman 78 dagar. Då han blei sleppt fri var siktinga utvida.

Torsdag 18. august var saka hans oppe i Nordhordland tingrett. Osingen var sikta for brot på straffeloven paragraf 162 første og andre ledd;

«for ulovlig å ha tilvirket, innført, ervervet, oppbevart eller overdratt narkotika, og overtredelsen anses som grov, idet det særlig legges vekt på hva slags stoff det gjelder, kvantumet og overtredelsens karakter».

Han var også sikta for bruk av 27 gram narkotika.

Sikta møtte og tilsto. Men han ville ikkje gje ut namn på kontaktar/medkontrahenter.

I tillegg til fengselstraff for sal, oppbevaring og bruk måtte sikta tåla beslag av pengar. Spørsmålet blei kor mykje.

Sikta påsto at berre 50.000 kroner stamma frå sal av narkotika, resten, 60.000 kroner, var oppspart frå ordinær lønn.

Retten fann det vanskeleg å motbevisa dette.

Sikta blei dømt til 2 år fengsel. 78 dagar sont varetekt kjem til frådrag. I tillegg må osingen tåla beslag av 50.000 kroner.