Dømt for trugslar, narkotika og promillekøyring

Ein mann i 20-åra fekk denne veka ein dom på 60 dagar fengsel, 15.000 kroner i bot og tap av førarretten for alltid.

Han var tiltalt for 7 ulike lovbrot, inkludert 3 tilleggspostar, som handla om trugslar mot politiet, i Os og på Sunnmøre, narkotika, promillekøyring og køyring mot betaling utan løyve (piratdrosje) i Bergen.

I handjern etter slosting på fest

Mannen er ikkje busett i Os, men første og andre tiltalepost handlar om ein episode i Os. Politiet rykte i 5-tida om morgonen, ein laurdag i oktober 2016, ut til ein fest på Søfteland etter melding om slosting.

Tiltalte blei pågripen og påsett handjern. Han skal du ha uttalt både at han skulle drepa politibetjenten, og at han skulle skalla ut alle tenna i kjeften hans. Politiet fann cirka 4 gram hasj i lomma hans.

I post I b) er han tiltalt for tilsvarande trugslar mot ein politibetjent i ein kommune på Sunnmøre i juli året etter.

Erkjente seg skyldig i nesten alle postane

I november 2016 blei han tatt, mistenkt for å køyra passasjerar mot betaling frå Bergen sentrum til Loddefjord, i juni 2017 blei han tatt for køyring med 1,66 i promille. I april i år var han bak rattet igjen, utan førarkort, påverka av hasj.

Tiltalte møtte og erkjente seg skyldig i alle postar, med unntak av trugslane mot politiet i Os, og piratdrosjekøyring i Bergen.

Aktor let post 3, om piratdrosje, ligga, men fann det bevist at mannen hadde framsett trugslane i post I a). Tiltalte forklarte at han sjølv ikkje hugsa noko frå kvelden, og at han har lett for å seia slike ting i fylla, utan at han meiner noko alvorleg med det.