Dramatisk Os-siger
Kjøkkelvik brant straffe ved full tid. Handballdamene til Os med sin andre siger.
Bildeserie:
Det blei dramatisk i Oshallen då damelaget til Os tok imot Kjøkkelvik til kamp sundag ettermiddag. På stillinga 32-31 og eitt sekund att å spele fekk Kjøkkelvik straffe og moglegheiten til å berge uavgjort.
Vibeke Ingebrigtsen i Osmålet hadde full ro. Kjøkkelvik-spelaren satsar på kraft og brenn straffeskotet i tverrliggeren til juble frå heimepublikummet.
– Det var deilig med enno ein siger.
– Det fortente jentene, smiler ei glad Gitte Torp etter kampen.
Leia store delar
Os kom godt i gang mot Kjøkkelvik og tok leiinga, men klarte aldri å riste av seg gjestene. På stillinga 10-8 får Caroline Cook to minutt utvisning.
Kjøkkelvik tek eit taktisk grep og legg ut to merker på Os-spelarane, noko som gjer at det stokkar seg for Osangrepet og Kjøkkevik vinn overtalsperioda 3-0.
Med fullt lag på banen tek Os seg oppatt, sjølv med to merker mot seg, noko som gjer at Os går til pause med 18-15 leiing.
Andre omgangen held fram med Os i føringa, i perioder heile fem mål framfor, men Kjøkkelvik gir ikkje opp og kjempar seg innatt i kampen. Med fem minutt att er Os berre eitt mål framfor 29-28.
Dei siste minutta blei nervepirrande, men Ospublikummet kunne puste letta ut etter straffemissen i siste sekund og siger 32-31.
– Gjer som avtalt
Trenar Gitte Torp er nøgd med jentene sundag. Ikkje berre på grunn av sigeren, men også spelet varma.
– I dag eg eg nøgd med at vi unngår dei store sviningane. Vi har ikkje ei down-periode slik som vi har hatt ein tendens til tidlegare.
– I tillegg stressar spelarane mindre og tek betre val framover på bana.
– I dag gjer dei rett og slett slik vi avtalar på førehand.
La ut merke
Os var før kampen klar over Emilie Nyborg på Kjøkkelvik som ein farleg spelar og la difor ut merke på ho heile kampen.
– Det følger eg vi lukkast med.
– Når Madeleine Hjertnes styrar spelet så bra som i dag, og Hilde Kristine Røttingen viser den fighterviljen ho har, så går det vegen.
– I tillegg må vi ikkje gløyme Vibeke Ingebrigtsen i mål. Ho har nokre fantastiske redningar i dag, avslutter Torp.
Os - Kjøkkelvik 32-31 (18-15)
Utv: Os 3x2 min, Kjøkkelvik 2x2 min
Os sitt lag: Ann Kristin Lyssand, Caroline Fjellanger Cook 2, Elise Hjelle 6, Hilde Kristine Røttingen 10, Madeleine Hjertnes 7, Malin Hjelle Berentsen 3, Malin Lunde Fosen 2, Marte Øvreeide 1, Mona Stigen Heggeland, Silja Lunde Espelid, Tonje Hjertnes 1, Vibeke Ingebrigtsen.
Med sigeren over Kjøkkelvik er Os over streken og har god kontakt med laga framfor seg. Neste laurdag tek dei mot Stryn heime i Oshallen.