Driftige jenter for barneheim
Selde kaffi og saft for 410 kroner til inntekt for Nsumba barneheim i Uganda. No utvidar dei sortimentet.

Ronja Berg (10), Julie Vik (9) og Ylva Wik (kusina til Ronja frå Stavanger, 7 1/2) har dei siste dagane rigga seg til med salgsbod midt i Smiebakken på Haugsneset. I staden for å bruka pengene på seg sjølv bestemte dei driftige jentene at dei ville støtta ein god sak.
- Dei var innom både Redd Barna og andre organisasjonar, men då eg fortalde dei om Tove og Nsumba var dei ikkje i tvil om at det var dei som skulle få inntektene, fortel mor May-Liss Wik.
Kaffi, saft og loddsal
Dei tre jentene trakta kaffi og blanda saft for at naboar og andre på veg opp mot Lurane kunne få seg ein tår.
- Vi hadde òg loddsal med premiar vi fann på rommet, fortel Ronja Berg.
Totalt gav salet 410 kroner til barneheimen.
Held fram med varer frå Uganda
Då jentene var innom Tove Tvedt Skarstein fredag for å overrekkje pengane fekk dei både høyre meir om barneheimen og korleis ungane der har det.
- Tusen takk skal de ha. Dette betyr utruleg mykje for ungane på barneheimen, strålte Tvedt Skarstein om kapp med julisola.
- Hvis de har lyst kan de få plukke med nokre av varene eg har fått frå barneheimen og prøve å selja dei, smilte eldsjelen.
Jentene har fått smaken på å vera kremmarar og takka sjølvsagt ja til tilbodet. Så har du lyst ha handle med dei tre driftige jentene er det berre å ta turen opp Smiebakken.
Kjem til Noreg
16 av jentene frå barneheimen kjem til Noreg og vestlandet i desse dagane for tradisjonen tru å delta på Norway Cup.
- Det er Vadmyra som er klubben dei skal vitje i 11 dagar før dei reiser til Oslo.
- 24. juli kjem det til å vera open dag i Vadmyrahallen kor ein kan møte jentene og få med seg både afrikanske rytmer og meir til, avsluttar Tove Tvedt Skarstein.
Under marknadsdagane i sluten av juli gjekk fleire av butikkane på Osøyro saman om ein auksjon til inntekt for barneheimen. Denne samla inn 10.000 kroner. I tillegg blei det seld for 3.000 kroner av varer produsert på barneheimen.