Dro sigeren i land

Det blei høgdramatisk då Os fekk Bergen HK (BHK) på vitjing i årets siste kamp i kvinnenes 2. divisjon.

Osdamene kom godt i gang og var i føringa, men damene frå BHK gav aldri opp og klarte gjennom omgangen å snu kampen til sin fordel.

- Vi fekk ikkje kampen heilt dit vi ville.

- Vi var samde om å vera kompakte i forsvaret, men tapte for mange duellar. Framover klarte vi oss heilt greitt, oppsummerar Ostrenar Erlend Lyssand.

Snudde 14-18 til 21-18

Andreomgangen startar horribelt for Os. BHK dreg i frå og leier med fire mål før Osdamene vaknar.

- Når vi snur kampen frå 14-18 til 21-18 speler jentene strålande.

- Forsvarsspelet sit og framover lykkast vi med alt.

- Diverre er vi ikkje kyniske nok når vi er i ferd med å rykka frå og let i staden BHK få sleppa inn att i kampen, fortel Lyssand.

Osdamene blir for heite på julegrøten og tek for kjappe avslutningar i staden for å bruke tid og spele seg til gode målsjansar. Dermed blir det hektiske minutt på sluten kor trenerane på båe laga skrik seg hese på spelarane sine.

Skryt av Anna og Vilde

Ein viktig styrke for Osdamene er bredden i angrep. I laurdagens kamp er samtlege spelarar på skåringslista.

- Likevel må eg trekke fram Anna Bjørke Kallestad som er god i 60 minutt og blir toppskårar med 9 mål.

- Men ei som imponerte minst like mykje i går var Vilde Fyllingen som kjem inn frå benken og er så god som ho er. Skryt skal òg Elise Hjelle ha. Det å settja alle straffene er ikkje ei enkel oppgåve, avsluttar Erlend Lyssand som saman med Osdamene tek juleferie på tredjeplass på tabellen, eitt poeng bak Kjøkkelvik, men med to kampar mindre spelt.

Os-Bergen HK 28-27 (14-16)
Utv: Os 2x2 min, BHK 1x2 min
Os sitt lag: Anna Bjørke Kallestad (9), Tonje Hjertnes (2), Emilie Hjertnes (4), Maria Stangeland Lunde (1), Marte Øvreeide (1), Line Hjelle Berentsen (3), Vibeke Ingebrigtsen, Elise Hjelle (4), Vilde D. Fyllingen (3), Vilde Brattabø (1)

SJÅ TABELL