- Du klarde det pappa!

Bildeserie:

1 av 10

I to år har Erik Tysse måtte trena på eigahand, uten støtte frå friidrettsforbundet eller olympiatoppen. Sundag var han endeleg tilbake etter utestenginga og det på den siste dagen det var mogleg å kvalifisera seg til OL.

På heimebane i Os sentrum gjekk Tysse eit fantastisk løp og klarte kravet med ein margin på 39 sekund.

- Han vil bli innstilt til OL no, seier sportssjef i Norges Friidrettsforbund Ronny Nilsen.

Det endeleg uttaket er det Olympiatoppen som gjer måndag.

Fekk det tøft på slutten

Erik Tysse tok føringa frå starten og låg lenge saman med Hassanin Sebei frå Tunisia og Jakub Jelonek frå Polen. Etter om lag ti kilometer skrudde kappgangaren frå Os opp eit knepp og dei to andre måtte sleppa.

- Eg blei nok litt overmodig rundt halvvegs, men støtta og entusiasmen frå publikum gav meg så mykje energi.

- Det blei nok til at eg pressa litt hard akkurat då, så eg fekk det litt på slutten, fortel Erik Tysse.

Tysse meiner sjølv han kunne klart å pressa tida ned mot 1.20, men følte etterkvart at det ikkje var så viktig.

Fantastisk å sjå

Ein som visste at Erik hadde kvalifiseringstida på 1.21.45 inne var svoger og trenar Stephan Plätzer. Om lag midtvegs i løpet var han klar på korleis svogeren såg ut.

- Veldig bra!

Etter løpet fortalde Plätzer at han ikkje hadde vore uroleg for eleven, sjølv om han kanskje pressa på litt vel mykje.

- Dette var fantastisk å sjå!

Jamne runder

- Erik gjekk eit veldig jamt løp uten dei store forskjellene på rundetidene.

- Du blei ikkje uroleg når han stakk etter 10 kilometer då?

- Nei, eg var aldri uroa, men ein veit jo aldri.

- Det var varmt i dag og eg såg det var mange løparar som sleit med temperaturen. Så trygg kunne vi ikkje vera før Erik passerte målstreken, seier trenar Stephan Plätzer.

Mellom 1500 og 2000 tilskodarar

4 av dei 16 løperane som stilte på startstreken fekk det for tøft i varmen på Os og måtte bryte løpet.

- Dei fortalde etterpå at dei følte seg i fin form, men beina ville ikkje meir, fortel stemneleiar Kjersti Tysse Plätzer, som kunne gleda seg over at mellom 1500 og 2000 hadde tatt vegen til sentrum for å heia fram Erik og dei andre.