E39-mosjonistane slepp unna

Natt til måndag 29. august blei uvedkomande observert på rullekøyter i den nye Lyshorntunnelen på E39.

I denne perioden blei det utført test i tunellen, kor alle system knytt til tryggleik, sensorar, elektrisk anlegg og anna blei testa.

Etter hendinga med mosjonistane måtte dei starta testen på nytt.

Opninga av nyvegen er måndag 31. oktober, så sant tryggleiken blir godkjent.

Uventa hendingar skjer ofte i store vegprosjekt, og prosjektleiar Kelly Nesheim Iversen kan ikkje seia at denne hendinga åleine har ført til forseinkingar.

– Hendinga med mosjonistane er berre éin av mange ting som har skjedd i prosessen ved å bygga denne tunellen, forklarar ho.

Tok kontakt

Kort tid etter turen med rulleskøyter melde ein av mennene seg til prosjektleiaren. Dei angra.

No er Iversen klar for å legga saka bak seg.

– Det å forfølga dei med eit erstatningskrav ser eg på som bortkasta tid. Vi ønske ikkje å bruka krefter på det.

– Dei har tilstått, og no går vi vidare, seier Iversen til Midtsiden.

Opning av ny tunell

Om ein månad er det planlagt opning av E39 Svegatjørn-Rådal.

Samferdselsminister Jon-Ivar Nygård vil stå for den formelle åpningen og festen er open for alle som vil delta.

Prosjektleiaren ser fram til opningsdagen og er stolt over arbeidet dei har gjort.

– Det er vanskeleg å forstå kor stort dette prosjektet faktisk er, eg er veldig stolt over det vi har fått til og stolt over alle som har vore med på prosjektet, seier ho.

Om E39 Svegatjørn-Rådal

• Vegen frå innslaget på Skogafjellstunnelen ved Svegatjørn til du køyrer ut av Lyshorntunnelen er 11,8 km.
• Strekninga er på totalt 17,7 km og skal gå som firefelts motorveg mellom Os og Fana.
• 14,7 av den 17,7 kilometer lange vegen blir i tunnel
• Skogafjellstunnelen: 1,5 km
• Lyshorntunnelen: 9,2 km