Lokal | 18. des. 2014

E39 ut på anbod - fire veker framfor skjema

Vegvesenet på hugget: – I dag blir anbodspapira for E39 Svegatjørn-Rådal lagt ut på Doffin, seier prosjektleiar Sverre Ottesen.

E39 ut på anbod - fire veker framfor skjema
Representantar frå moglege entreprenørar fekk presentert planane på eit møte i oktober (foto: Andris Hamre)
Andris Hamretorsdag 18. des. 2014 10:39

Prosjektorganisasjonen i Statens vegvesen har arbeidd på spreng den siste tida for å gjera klare anbodspapira for dei to store kontraktene på E39 Svegatjørn-Rådal.

Opprinneleg var planen å offenleggjera desse 15. januar, men går det som dei no håperblir dei tilgjenglege på Doffin om lag klokka 14 i dag.

– Det er mykje som skal på plass og kvalitetssikrast, men det ser ut som vi kan trykka på knappen klokka 14.

– Då blir anboda tilgjenglege for entreprenørane, så får vi håpe vi ikkje øydelegg jula for dei, seier prosjektleiar i Statens vegvesen, Sverre Ottesen.

Les òg:
Held trøkket oppe

Omfattande arbeid

Med det har prosessen med ny veg til Bergen kome eitt sentralt steg vidare.

– Folka mine har jobba lenge med det. Det er eit omfattande arbeid som ligg til grunn for anbodspapira.

– Alt skal skildrast i detalj, mellom anna kor mykje trekkerør som skal reknast inn, kor mykje stein som skal takast ut og kor mykje asfalt som skal leggast.

– I tillegg skal det heile kvalitetssikrast og vi må dobbeltsjekka tidsfristar og anna. Men no nærmar vi oss mål.

– Det er kanskje ikkje ein milepæl, men det er i alle fall eit stort steg i rett retning, seier prosjektleiaren med eit smil.

Godt og fort

Då E39 Svegatjørn-Rådal blei handsama i Stortinget sparka Magne Rommetveit (Ap) litt til samferdselsminister Ketil Solvik-Olsen (Frp) på om ikkje ein kunne få ut papira fortare enn den tidsplanen som var lagt.

Statsråden svarte at det viktigaste var at det var godt det som blei lagt ut, enn at det gjekk fort.

– No trur eg vi tilfredsstillar begge to. Papira er kvalitetssikra og dei kjem fort ut.

Pris eineste kriterie

Opprinneleg var planen at dei to kontraktane, K10 - Svegatjørn-Fanavegen og K11 - Rådal-Nordås-Flyplassvegen, skulle ha same innleveringsfrist.

– Det har vi gjort litt om på. K11 får innleveringsfrist 21. april klokka 13.

– Pris er det einaste kriteriet som tel, så den som leverar lågast pris får jobben. Kven det blir veit vi då berre minutt seinare.

– K10 - Svegatjørn-Fanavegen, får frist 14 dagar seinare, 5. mai.

– Det gjev entreprenørane moglegheiten til å justere tilboda sine før dei leverar dei inn på det som er den største kontrakta.

– Vi trur det er den beste måten å oppnå lågast mogleg pris på den største kontrakta, forklarar Ottesen.

Oppstart 1. oktober

Prosjektleiaren reknar med å kunne skriva kontrakt med dei som får jobbane før fellesferien.

– Oppstarten på Nordås-kontrakten er satt til tidligast 1. september, medan Svegatjørn-kontrakten er ein månad seinare.

– Det har mellom anna med det at det er entreprenøren for K11 som skal driva steindeponiet i Hordnesskogen, og dei må få tid til å rydda skog og liknande før ein byrjer driving av Lyshorntunnellen frå Hamre.

– I tillegg er det eit krav frå vegdirektoratet at vi skal ha dialogmøter med entreprenørane før arbeidet tek til, slik at vi får eit best mogleg arbeidsklima og får avdekka kva utfordringar vi står ovenfor og korleis dei best kan løysast i felleskap.

– Når entreprenørane vel å starta arbeidet er litt opp til dei sjølve. Difor er det vanskeleg å seie når de kan vente byggjearbeid i Svegatjørn-området.

– Vi har berre sett frister for når dei skal vera ferdig, avsluttar Ottesen.

Kjempebra!

Ordførar Terje Søviknes (Frp) gler seg over at vegvesenet sender ut anboda allereie no.

– Det er kjempebra at dei får ut dette før jul.

– Her har vegvesenet stått på og gjort ein god jobb, skryt Søviknes.

Vegen mellom Os og Bergen skal stå ferdig i 2021/2022. I mellomtida kan du sjå korleis vegen blir her.

Spennande? Vil du ha ukas høgdepunkt i innboksen?

Tilbod: 1 månad for 1 kr

No kan du lesa Midtsiden.no i 1 månad for kun 1 kr.

  • Tilgang til alt innhald
  • Utan bindingstid
  • Frå 145 kr/md.
Les meir og bestill

Abonnementet blir fornya kvar månad. Du kan seia opp kor tid du vil, og blir då ikkje belasta for neste periode.