EDB frå Equador

Dani Canizares hadde 20 års fartstid innan IT før han etablerte bedrift i heimbygda til sambuaren frå Os.

Kjetil Vasby Bruarøysøndag 17. okt. 2010 20:26

Dani Canizares hadde jobba med datatenester og omsetjing i Spania og Skottland før han i Denver (USA) blei kollega med Lene Drageset Lyssand.

- Vi jobba begge for Lionbridge, eg med datatenester og Lene med omsetjing, då vi møtte kvarandre, blei kjent og etterkvart forelska, fortel Canizares.

Til Os i mai
Etterkvart reiste Dani med Lene til Os, og kollegaen frå Noreg hadde tydelegvis god timing.

- Vi kom til Os i mai i fjor, var i båt og fiska, besøkte Bergen og helste på familie og venar av Lene. Eg syntes det var heilt nydeleg, og vi bestemte oss for å flytta her til.

I vinter kom dei til Os med koffertane sine, i februar etablerte dei eiga verksemd.

Travel start
Lyssand Canizares Consult leverer generelle IT-tenester, men også animasjonsfilmar, designløysingar og omsetjing.

- Fram til i sommar hadde vi fulltidsoppdrag for It´s learning (programmet skuleelevar i Noreg og utlandet bruker til blant anna å gjera og levera lekser). Innimellom har vi hatt tid til ein del web- og animasjonsoppdrag, fortel Dani.

Eit nettverk av tenester
Kundane har vore frå både Os og andre plassar i Noreg, kompetansen som har vore kopla inn er endå meir eksotisk.

- Eg har brukt animasjonar laga av ein leverandør i Equador og også hatt ekstern hjelp då eg skulle omsetja ei webside til 23 ulike språk. Arabisk var vanskeleg, då det skal lesast frå høgre til venstre, men vi fiksa det òg.

- Det er ein fordel at vi har lang fartstid og mange kontaktar, det gjer at vi raskare kan løysa utfordringar, anten det er for større kundar eller som underleverandør for eit anna datafirma eller reklamebyrå.

Vil veksa
Canizares har ingeniørutdanning innan IT og mastergrad i bedriftsøkonomi. Før han jobba i Lionbridge saman med Lyssand i Denver jobba han 10 år i Spania seinare nokre år for eit software-firma i Skottland.

Overgangen frå store internasjonale konsern til enkeltmannsforetak i Os har nok vore stor, men Canizares er førebudd på overgang til aksjeselskap og vidare vekst.

- Lene jobbar i familiebedrifta Drageset Varehus når ho ikkje er med meg i drifta av firma. Vi har fått ein god start på selskapet vårt og håper på sikt å jobba saman og veksa vidare med kundar i og utanfor kommune- og landegrensene, seier Dani Canizares.