Næringsliv | 19. feb. 2018

– Eg veit ikkje om vi opnar igjen

Det er fleire årsaker til at den nye fiskebutikken no blir stengt, men ikkje umogleg at den kjem i drift igjen.

– Eg veit ikkje om vi opnar igjen
Freyr har i dag stengt butikken Isfisk. Det er uvisst når og om den opnar igjen. (Foto: Kjetil Vasby Bruarøy)
Kjetil Vasby Bruarøy
Kjetil Vasby Bruarøymandag 19. feb. 2018 09:36

Han fekk ei varm mottaking, Hlynur Freyr Vigfusson, då han i juni i fjor fortalte at han ville opna fiskebutikk i heimbygda.

Torsdag 26. oktober opna butikken «Isfisk» i Elvebakken i Byvegen.

– Vi fekk ein god start og hadde stabil og fin omsetnad fram til jul. Butikken blei akkurat som eg hadde håpa på, med god lokalhandel-stemning og fleire stamkundar som handlar fersk fisk til middag 3-4 gongar i veka, fortel Freyr.

Etter nyttår har omsetnaden blitt meir enn halvert.

– I dag stenger vi butikken på ubestemt tid. Det er mogleg vi opnar igjen, men det blir så fall fleire veker til.

Samtidig hadde Freyr ein del å ta tak i då det kom til hovudinntektskjelda; linefiskebåten som han eig.

Milliontap etter havari

Freyr har jobba som yrkesfiskar sidan han var 16 år. For cirka ti år sidan flytta han til Noreg, og bur på Strøno med kone og to born. Dei siste tre-fire åra har han drive fiske frå eigen båt.

Men han var ikkje om bord då det i haust gjekk gale.

– Mannskapen grunnstøtte og båten var ute av drift i sju veker. Det gjorde at vi mista frifiske-perioden, ei tid då vi normalt fiskar for rundt ein million kroner i månaden.

Ny forskrift sender Freyr ut av butikken

Etter kostnadar med etablering av ny butikk og tap av viktige fiskerikroner blei det ein tøff start på 2018 for Freyr.

– Heldigvis har fisket godt veldig bra. Vi har fått over 100 tonn på fire veker, seinast torsdag fekk vi 8,5 tonn om bord.

I desember kom «deltakarforskrifta 2018», som blant anna seier «ein innfører krav om at fartøyeigar må stå om bord i fartøyet som høvedsmann under utøving av fiske i open gruppe i alle fiskeria i deltakarforskrifta, unnateke rekefisket ved Grønland».

– Eg har hatt flinke tilsette hos meg, og det var ikkje meininga at eg berre skulle stå i butikken. Men som gründer hjelper det at du er der av og til. Med denne forskrifta, som tredde i kraft 1. januar, MÅ eg vera om bord heile tida.

Har interessentar

Freyr har hatt kontakt med interessentar som ønskjer å kjøpa butikken. Han har ikkje bestemt seg for kva han vil gjera vidare med Fiskbutikken AS, men i går beslutta han å stenga.

– Eg veit ikkje kva vi endar opp med, men eg har veldig lyst til å ha butikken sjølv. Om fisket blir bra også i vekene som kjem, så får eg midlar til å opna igjen.

Etter seks veker på fiske er Freyr no heime med ryggskade, og kan grunna sjukmeldinga lata andre driva båten mens han er i land.

– Vi fiska 100 tonn, ryggen rauk etter 75. Eg har operert fleire gongar før og må nok under kniven denne gong òg. Men eg har godt mannskap om bord, og håper dei får nokre fine veker framover, seier Freyr, og takkar alle som har handla hos Isfisk desse fire månadane butikken var open.

I dag tar han telefonar til leverandørane. Det er mogleg at han held open ein dag seinare i veka for å ha sal på varene han har på frys.

Spennande? Vil du ha ukas høgdepunkt i innboksen?

Tilbod: 1 månad for 1 kr

No kan du lesa Midtsiden.no i 1 månad for kun 1 kr.

  • Tilgang til alt innhald
  • Utan bindingstid
  • Frå 145 kr/md.
Les meir og bestill

Abonnementet blir fornya kvar månad. Du kan seia opp kor tid du vil, og blir då ikkje belasta for neste periode.