Seint torsdag kveld var det ei trafikkulykke på E39 mellom bruene i Kolskogen.
Eit vogntog med retning nord mot Bergen trefte midtrabatten, noko som resulterte i at E39 vart stengt i nærare seks timar.
Til politiet kunne sjåføren opplysa at han hadde svingt unna eit dyr, truleg ein hjort, og trefte i unnamanøveren midtrabatten.
Politioverbetjent ved Bjørnafjorden lensmannskontor, Anne Lyssand, kunne fredag opplysa at det er oppretta sak etter ulykka.
– Dette er livsfarleg!
I helga vart Midtsiden kontakta av ein lesar som reagerte kraftig på korleis det såg ut på ulykkesstaden etter at oppryddinga var ferdig.
Mannen, som ønskjer å vera anonym, seier at han sjølv har erfaring frå vegbygging, og at han er sjokkert over sikringstiltaka.
– Fartsgrensa på staden er framleis 80 kilometer i timen, og framfor dei utstikkande restane av det doble autovernet som utgjer midtrabatten er det berre sett opp nokre fluoriserande markeringsskilt.
– Dette er ei potensiell dødsfelle om til dømes ein personbil skulle køyra inn i midtrabatten.
– Dette er ok
Midtsiden tok måndag føremiddag kontakt med Vegtrafikksentralen vest for å høyra om dei rekna ulykkesstaden som naudsynt sikra.
Svaret frå Vegtrafikksentralen var då at entreprenør natt til fredag skulle ha gjort naudsynt arbeid med å sikra staden.
– Dette er ikkje ok
Etter at Midtsiden sendte ferske bilde frå ulykkesstaden, ringte trafikkoperatør frå vegtrafikksentralen, Erik Elnes tilbake.
Elnes kunne då fortelja at her var det ikkje ok likevel.
– Det har vore nokre misforståingar her, og fartsgrensa, som skulle vore sett ned, har dessverre ikkje blitt redusert.
– Vi har no bede entreprenør dra ut på staden og skilta fartsgrensa ned til 50 kilometer i timen forbi ulykkesstaden. Eg reknar med at dette blir gjort mens du skriv på saka.
Elnes legg til at ny støtpute er bestilt, og vil bli montert på enden av midtrabatten så snart den er i hende.
