– Ei lærerik veke

Tekst: Emily Marie Johnsen og Martin Ziegler, elevar i 9 A ved Nore Neset skule, på arbeidsveke i Midtsiden-redaksjonen.

Denne veka har vi vore på arbeidsveke hos Midtsiden. Blant oppdraga var intervju med andre elevar i yrkespraksis veka før påske.

Vi har intervjua fire elevar frå Nore Neset skule om kva dei gjer i arbeidsveka og korleis dei opplever det å vera i arbeidslivet. Her kan du lesa om dei ulike oppdraga deira og kva dei synest om det å vera i arbeid.

Even på Engeline

Ein av dei vi har besøkt er Even Lepsøy, som har vald å arbeida Kafé Engeline på Osøyro.

Tysdag møter vi han inne i kafeen. Han står i kassen og held på med ein kunde idet vi kjem inn:

– Kvifor valte du dette yrket?

– Fordi det virkar interessant. Eg ville prøva meg i restaurant- og matfaget og sjå korleis det er.

– Kva gjer du på arbeidsplassen og kva er dine oppgåver?

– For det meste lager eg mat til kundane, vaskar opp, ryddar bord og tek imot bestillingar.

– Kva er positivt og negativt med å arbeida her på Engeline?

– Det positive er at eg får prøva meg innanfor det eg interesserer meg for og eg får jobba med dyktige menneske. Ein negativ ting kan vera at det blir mykje ståing, men det går greit, seier han med eit smil.

– Kva ventar du å læra med å jobba her?

– Eg håper at eg kjem til å klara å laga litt meir variert mat. Eg håper også eg lærer meg forskjellige salsteknikkar og litt innanfor kundeservice.

– Blei det å arbeida her slik du hadde førestelt deg?

– Nei. Det var meir å gjera enn eg trudde og litt meir varierte oppgåver. Dette er jo sjølvsagt positivt.

– Kunne du tenka deg å jobba med dette eller utdanna deg innan faget seinare?

– Ja, det kunne eg. Dette er eit yrke der det alltid er noko å gjera på og det skjer noko heile tida.

Enya i barnehage i Øyane

Elevane har valt vidt forskjellige yrke. Til dømes har Enya Sofie Johnsen og nokre venninner valt å arbeida i naturbarnehagen i Øyane som barnehageassistent:

– Kvifor valte du dette yrket i arbeidsveka?

–Fordi eg liker å vera saman med ungar og eg synest det er interessant.

– Kva er dine oppgåver?

–Mine oppgåver går for det meste ut på å vera med på dei ulike aktivitetane, og turgåing utgjer store delar av dette.

– Kva er positivt og negativt med å jobba i barnehagen?

–Det positive er jo at ungane er utruleg greie og skjønne. Det er fint å ha nokon som ser opp til deg. Det at ungane ser på deg som ein vaksen gjer at du får meir utbyte av det å prøva deg i arbeidslivet. Det som kan vera negativt er at ungane kan være litt gretne av og til og det er ganske mykje støy heile tida.

– Kva ventar du å læra denne veka?

–Eg håper eg får lært meg korleis eg passar på ungar og kva arbeidsoppgåvene går ut på. Eg håper også at eg vil forstå born betre etter denne veka.

– Er jobben sånn du hadde trudd?

–Ja, eigentleg.

– Kunne du tenka deg å utdanna deg innanfor dette?

–Kanskje, men då trur eg at eg vil sikta meg inn på litt eldre barn. Men eg kunne godt tenka meg å jobba med born og ungdom, ja.

Rørleggar Øvstedal

Vi har også møtt Markus Øvstedal. Han har hatt si arbeidsveke hos Engevik Rørleggerservice:

– Kvifor valte du dette yrket?

–Eg tenkte det kunne bli gøy å driva med det i framtida, og at det då ville vera lurt å veta litt korleis jobben er.

– Kva er dine arbeidsoppgåver?

–Vi er innimellom ute og køyrer bil, men eg har også vore i butikken i Os sentrum.

– Kva er positivt og negativt med jobben?

–Ein positiv ting er at det er ein ganske roleg jobb. Samtidig som det er ganske varierte arbeidsoppgåver. Det er bra vi får prøva oss i arbeidslivet innanfor interessene våre. Ein negativ ting kan vera at vi av og til må køyre ganske langt til kundane våre.

– Kva ventar du å læra?

–Forskjellige ting. Til dømes korleis du set saman rør. Eg ventar også å få eit nærmare innblikk i korleis ein rørleggar jobbar i praksis.

– Var det å jobba her som du hadde venta?

–Ja, for det meste.

– Kunne du tenka deg å utdanna deg innafor dette seinare?

–Ja, det ein ganske interessant jobb, og du får halda på med mykje forskjellig.

Isak blei sendt til fjells

Den siste vi har intervjua er Isak Røttingen Eidsvik. Han har vald å jobbe i kommunen på kart og oppmåling, teknisk driftsavdeling og prosjektavdeling.

– Kvifor valte du dette yrket i arbeidsveka?

– Fordi eg synest det virka spennande og interessant å jobbe i kommunen.

– Kva gjer du på arbeidsplassen?

– Vi held på med utruleg masse forskjellig. Til dømes driv vi med kart og oppmåling. Eg har vore på teknisk driftsavdeling og prosjektavdeling. Eg er for det meste med på dei forskjellige oppdraga dei tilsette har. Eg har vore på eit reinseanlegg og vore med på å teikna kart. Vi er eigentleg litt over alt.

– Kva er positivt og negativt med å jobba i kommunen?

– Det positive er at du ikkje berre driv med éin spesiell ting. Arbeidet er utruleg variert. Det negative er at det kan bli litt mykje køyring med bil.

– Kva ventar du å læra?

– Det eg allereie har lært er å laga tverrprofil av ein eigedom. Eg har også vore på eit reinseanlegg og ein pumpestasjon og fått sett korleis dei virkar.

– Blei det å arbeide her slik du hadde trudd?

– Nei, faktisk ikkje. Det er litt fleire ting å halda på med enn eg hadde sett føre meg.

– Kunne du tenka deg å jobba i kommunen eller ta utdanning innan kart og oppmåling?

– Er litt usikker på det… kanskje. Det virkar jo som ein spennande og interessant jobb.