– Ei stor oppleving

Bildeserie:

1 av 10

J14- og G16-laga til Os Turn tok seg begge til kvartfinalen i den prestisjetunge turneringa Norway Cup førre helg. Diverre enda båe kampane med 0-3 og heimreise dagen før finalane.

Likevel er jentetrenar Kjetil Lyssand Lindbom strålande nøgd med prestasjonen og opplevinga.

- Det er ein ufatteleg fin gjeng som heile tida vil bli betre. Difor er eg optimistisk for framtida på damesida i fotballen, fortel Lindbom.

Oppdatering 7. august: Frå informerte kjelder har vi fått veta at jenter 89/90 i 2006 tok seg til semifinalen i Norway Cup. Dette er nok den beste prestasjonen for eit jentelag frå Os Turn i turneringa. 89/90-jentene vann òg tre cupar og blei kretsmeistrar.

Mange nye vener

Årets turnering, den førtiande i rekkja, var første gongen dei talentfulle jentene frå Os deltok.

- Eg har eit bestemt inntrykk av at jentene har storkost seg.

- Det at vi budde på skule gjorde at dei fekk kjenna på cup-livet og bli kjend med mange nye. Eg trur ho eg har her heime har fått 15-16 nye facebookvener etter at ho kom heim, smiler trenaren.

Foreldra på sidelina viktig

Lindbom fortel at også foreldra rapporterar tilbake at dei hadde ei flott oppleving og at det syntest det var kjekt å vera med jentene på cup.

- Eg trur at det at så mange av jentene hadde med seg foreldra på sidelinja gjorde at dei presterte så bra som dei gjorde.

- Viktigheita av å ha nokon som støtter langs linja skal ikkje undervurderast, slår Lindbom fast i det han fortel at støtta er like stor i seriekampane her heime. Det kan då nemnast at jentene vann vårsesongen og no skal spela ei tøff høstgruppe med mellomanna Arna-Bjørnar, Sotra og Hetlevik på motsatt banehalvleik.

Trå start, sto på i gjørma

Jentelaget blei puljevinnar med 4-1 over Lena, 3-0 over Ballerup-Skovlunde og 2-0 over Nordstrand.

I sluttspelet slo dei ut Surnadal (3-1) og Team Nes (2-1 etter ekstraomgangar) før dei måtte gi tapt for Sogndal (0-3).

- Vi fekk ein trå start på turneringa. Sjølv om vi vann kom ikkje sigrane så lett som vi er vant til i serien.

- Kanskje var frykta for å tapa større enn gleda over å spele, analyserar jentetrenaren.

Etterkvart betra det seg utover i turneringa og då Nes sto på motsatt bane var gnisten og lysta så definitivt der.

- Etterkvart som jentene senka skuldrane fekk eg trua på at dette kunne gå langt.

- I kampen mot Nes spilte vi mot eit godt lag, men jentene gikk i kjellaren og kjempa det dei kunne på ei etterkvart tung og gjørmete bane, fortel Lindbom.

Strålande med ein kamp om dagen

Om det var ei utlading etter den tøffe 1/8-delsfinala som gjorde at dei ikkje var heilt på i kvartfinalen mot Sogndal er ikkje godt å seie, men i følgje trenaren virka det som om jentene var mentalt sliten då dei møtte Sogndal.

- Det er klart eg tykkjer det var bittert å tapa for Sogndal etter at vi tapte Sognefjord Cup mot dei på myntkast i fjor, men slik er det av og til.

- Men korleis var det å berre skulle spille ein kamp om dagen? I andre cupar spelar de jo både to og tre.

- Det var eigentleg veldig greitt. Då kunne vi ta oss ut i den eine kampen og få restituera godt før neste.

- Slik sett var det ei veldig positiv oppleving å delta på Norway Cup, avsluttar trenar Kjetil Lyssand Lindbom.

Video: Gutelaget tok seg òg til kvartfinalen. I videoen kan du sjå Bjarte Halhjem si 3-0-skåring på straffe i 1/8-delsfinalen mot Alunorte Rain Forest, og den elleville jubeldansen då kampen kort tid etter blei blåse av (Foto: Kjetil Vasby Bruarøy).