Eigedomsmeklar blei "pilot"
Med fjernstyrt speglrefleks: Etter å ha brukt 25.000 kroner på å leiga helikopter fann Arild Vikøyr ut at han like gjerne kunne ta flyfoto sjølv - frå bakken.
Bildeserie:
– Når du har lært deg å fly er sjølve fotograferinga veldig enkel, seier dagleg leiar ved Privatmegleren Bjørnefjorden, Arild Vikøyr.
Med ujamne mellomrom sidan 2008 har kundar som vil selja hus bedd om foto som viser eigedomen og området rundt frå lufta.
– Vi leigde helikopter og tok eit raid over Os for å bygga eit bra arkiv over fleire nabolag. I 2009 var vi i lufta for å oppdatera dette og første kvartal 2010 brukte vi 25.000 kroner på anten å leiga helikopter og fotografera sjølv, eller leiga personell med fjernstyrt helikopter med påmontert kamera.
Då bestemte Vikøyr og kollega Herman Brandt seg for å ta saka i eigne hender.
Øvde på pc-en
Sjølv om summen på 25.000 kroner i leige på tre månadar nok var over normalen, rekna Vikøyr og Brandt med at dei fort kunne tena inn igjen eit fjernstyrt helikopter, eller oktokopter, som dei blir kalla med åtte rotorar.
Men for at investeringa ikkje skulle enda i grus måtte dei to øva på å fly.
– Du kan lasta ned svært realistiske simulatorar til pc og kjøpa fjernkontroll lik den du bruker når du har kjøpt helikopter.
– Vi øvde i eitt år, på pc og med bilige leikehelikopter, før vi gjekk i lufta med eige oktokopter.
Til Granvin for å handla
Dei to hadde søkt etter utstyr og funne i prisklassane frå 50.000 til 500.000.
– Eit forma i Granvin har spesialisert seg på dette. Vi reiste inn og kjøpte eit helikopter til rundt 100.000 kroner.
Med påmontert fjernstyrt kompaktkamera blei det tatt mange gode bilde frå lufta i 2011 og starten på 2012, men i sommar hadde dei eit uhell.
– No har vi kjøpt eit nytt oktokopter, som kan løfta tyngre fotoutstyr, i tillegg til at vi har reparert og oppgradert det førre.
Topp kvalitet og stor rekkevidde
Privatmegleren Bjørnefjorden sitt største oktokopter har påmontert ein Canon 5D, eit fullformat speglreflekskamera til over 20.000 kroner.
– Vi bruker stort sett 17-40 mm objektiv så vi får med store delar av nabolaget.
– Det er ikkje berre eigedomen som skal seljast som er interessant å visa, det er kjekt for interessentar å sjå kva som ligg rundt huset. Kanskje får dei eit betre inntrykk av kor langt det er til skulen, idrettsplassen eller sjøen.
Medan Vikøyr står med fjernkontrollen står ein kollega med ein skjerm som får tilsendt bilda som blir tatt. Sånn kan dei få stadfesta at dei har rett høgd og vinkel på kamera.
Oktokopteret har GPS og kan låsast i ein bestemt posisjon. Det har også høgdemålar og kan låsast i ei bestemt høgd over havet. Med "heim"-knapp kan du få det tilbake med autopilot, men landinga må du ta sjølv.
– Kor langt kan du fly med oktokopteret?
– Så langt at du ikkje ser det lenger. Men desse lengre vekk du kjører det dess meir batteri bruker du, så om du skal dekka eit større område er det best å setja seg i bilen å letta frå ulike plassar, seier Arild Vikøyr.