Ein ekstra bonus
Ombygginga av Oseana går etter planen og endringane har vist seg å ha ei ekstra plusside.

- Sjå på denne flotte plassen vi kjem til å få her! seier Oseana sin direktør Ole Tobias Lindeberg entusiastisk.
Han viser til den nye uteplassen som har tatt form utanfor Vargasalen, der det tidlegare var fjell.
Klart til hausten
Arbeidet med å bygga om Oseana for å fylla Arbeidstilsynet sine krav skal vera ferdig til Os Kulturskule startar opp igjen til hausten.
- Ting tar tid, men det går etter planen, seier Lindeberg.
Endringane omfattar blant anna at fleire av undervisningsromma har no fått vindauge og nok sollys.
Kulturskulen har også fått nytt kontorlokale i tredje etasje.
- Vi har også fått eit flott rom utanfor Vargasalen som, saman med den fine nye uteplassen, gjev nye moglegheitar både for kulturskulen og med tanke på utleige.
Skal bli godt å bli ferdig
Etter at dei nødvendige endringane er på plass for kulturskulen vil det bli ombygging i foajeen.
Der skal det koma publikumstoalett så gjestane slepp å gå ned og gjennom restauranten for å gå på toalettet.
- Det kjem til å bli veldig bra både for gjestane som er på arrangement i Oseana og for gjestane i restauranten, seier Lindeberg.
- No gler vi oss veldig til all ombygginga er ferdig og vi kan koma oss vidare.
- Og både vi, og ikkje minst reinhaldsarbeidarane, ser fram til å sleppa alt støvet byggearbeidet tar med seg, avsluttar Lindeberg med eit smil.