– Ein fest for store og små!

– Vårsleppet i mai var veldig vellukka, no håper vi på fine sommardagar i sentrum, seier leiar i Os Sentrumsforening, Geir Amundsen.

Ifølgje vêrmeldingane blir starten sommarleg, med 20 gradar og skyfri himmel torsdag. Fredag skal det skya over og laurdag blir det truleg regn. Yr melder meir nedbør enn Storm.

Sjå bilde og video frå Vårsleppet i mai.

Årets marknadsdagar har 32 utstillarar. 11 av dei er etablerte butikkar som flytter delar av utvalet utandørs, 21 er tilreisande.

– Det blir blant anna VW, ATV, gravemaskiner, snop mat, aloe vera, klede, kosmetikk, trekunst, bilutstyr, rosemåling og sal av bustadar på marknaden, fortel Amundsen.

Er du god med minigravar?

Ein av dei som kjem på banen med morosame bidrag under årets marknadsdagar er Olav Walle, som før jul overtok Intersport Rosvold.

– Rosvold-butikken arrangerer konkurranse i både hesteskokasting og presisjonskjøring av gravemaskin. Utanfor butikken kan du prøva om du klarer å få ei potet som heng frå grabben ned i ein boks, fortel Geir.

Det blir også arrangert rebusløp i Os sentrum frå torsdag til og med laurdag.

Engeline flyttar ut

Saman med tilreisande utstillarar flyttar dei fleste butikkane i sentrum delar av varene sine ut på gata for å stilla ut desse dagane.

– Også Kafé Engeline flyttar ut og tar med seg delar av utvalet sitt nærmare Torget for å servera gjestane desse dagane, fortel Amundsen.

Zumba og sommarmote

Marknadsdagane handlar ikkje berre om handel. Hoppeslott og lett underhaldning høyrer også med.

– Mange butikkar deltar nå vi set opp moteshow. I tillegg er treningssentrene Sprek og Blid og Actic blant utstillarane, og dei har plan om å visa litt av det dei kan, både zumba og aerobic.