– Ein klubb med ambisjonar

Svenske Jesper Svensson, som før denne sesongen kom frå eliteserielaget Bodø til Os sitt herrelag, har signert treårskontrakt med dei gule og svarte.

– Med Jesper som trenar for både herre og damelaget, pluss som trenarkoordinator og utviklar, har vi fått ein kjemperessurs inn på det sportslege, seier ein nøgd leiar i handballgruppa, Andris Hamre.

Skal byggja treningskultur

Bakgrunnen for at Os Turn engasjerer Svensson er i ei strategisk satsing, forklarer Hamre.

– Vi ønskjer å bringa Os tilbake til gamle høgder. Skal vi klare det må vi bygga klubben og skapa ein treningskultur heilt frå dei aldersbestemte laga.

– Vi treng rett og slett ein raud tråd frå dei minste og opp til seniorlaga. Dette skal Jesper hjelpa oss med i rolla som trenarutvikler for dei aldersbestemte trenarane.

– Aldri, har det i den tida eg har vore i handballen, vore brukt så mykje pengar på å styrka trenarapparatet som det vi no gjer.

– Korleis finansierar de ei slik 100 prosent-stilling?

– Det gjer vi ved å omdisponera nokre av midla vi i dag nyttar på det sportslege.

– I tillegg håper vi sjølvsagt at samarbeidspartnarane våre vil vera med på satsinga, men reint økonomisk kjem vi i mål med dei midla vi har i dag.

– Ein anna ting vi håper skal lata seg gjera, med ny hall under oppsegling, er å ta oppatt diskusjonane med dei vidaregåande skulane i bygda om handball som valfag toppidrett, seier ein entusiastisk handball-leiar.

– Spennande utfordring

Svensson, som har 15 år bak seg som topptrenar i Sverige, Tyskland, Italia, Danmark og Noreg, finn utfordringa frå Os tiltalande.

– Os er ein klubb med ambisjonar og vilje.

– Det eg har fått presentert fann eg både attraktivt og spennande, fortel Svensson, som var med på tilsvarande då han starta trenarkarriera i IK Sævehof frå Göteborg i 1998.