06. jan. 2009

- Ein stasjon for framtida

Landingsplass for helikopter, spesialutstyr for Os Sjøfront og badstove står på ønskelista til Gjøsund.

- Ein stasjon for framtida
Kjetil Vasby Bruarøy
Kjetil Vasby Bruarøytysdag 06. jan. 2009 10:02


- Endeleg kan vi bretta opp ermene og byrja å jobba mot noko som skal realiserast, seier brannsjef Stein Gjøsund.

I kommunestyremøtet 16. desember blei Frp og Høgre sitt framlegg til budsjett for 2009 vedtatt, saman med økonomiplan for 2009 til 2012. I framlegget fekk posten ”ny brannstasjon” 10 millionar kroner i tillegg til dei 14,5 millionane som var løyvd frå før.

På anbod om 3 månadar
Totalentreprise for brannstasjonen skal ut på anbod. Men først skal det gjerast ein del forarbeid.

- Vi er godt i gang med romplan og liste over fasilitetar og tekniske krav. Men oppgåvene er mange før prosjektet kan gå ut på anbod, truleg kan vi ikkje senda det ut før om to til tre månadar, trur brannsjefen.

Landingsplass i le
Tomta som brannstasjonen skal byggast på ligg på Moberg, er om lag 10 mål stor, og grensar både til E39 og RV552 (som går frå rundkjøringa og ned til Osøyro).

- Brannstasjonen blir nok bygd sør på tomta, nær brua, medan landingsplassen for helikopter blir i nord. Det er oftast sønnavind her, så då kan helikopteret landa noko skjerma bak stasjonen, forklarar Gjøsund.

Tenker fleire tiår fram
Dersom brannstasjonen blir over to etasjar, ønskjer brannsjefen seg glistang for rask transport frå 2. til 1. etasje. Og truleg for å setja ein liten spiss på den årlege ”open brannstasjon” for dei minste.

- Det er mykje som blir betre med ny stasjon, men det viktigaste er utvida plass.Plass til utstyr, så vi slepp å rydda vekk stablar før vi rykker ut, og plass til vedlikehald, så vi slepp å vaska slangane halvvegs ut i trafikken.

- Arbeidsmiljølova seier også ein del om fasilitetar, blant anna treng vi garderobar med dusj til alle tilsette og begge kjønn.

Og den nye brannstasjonen skal ikkje berre bli god nok for dei 9 som har arbeidsdagen sin der, og dei 20 deltidstilsette.

- Vi må tenka nokre år fram når vi bygger, og fleire tiår fram når vi planlegg. Kanskje må vi bygga på om 20 år, kanskje blir politi, ambulanse og brannvesen samla på same tomt. Då er det ein fordel om plassering på tomt og rominndeling gjer utviding enkel og rimeleg, seier Stein.

Nye høgder – nytt utstyr
Det var ikkje berre ny brannstasjon som blei sikra i kommunestyremøtet før jul, Os Sjøfront fekk reguleringsplanen sin godkjent, noko som også påverkar brannvesenet.

- Med slike byggehøgder blir vi forplikta å ha høgdeberedskap, og garasje til eige utstyr for å driva sløkking og redning i høgda blir med i planane for den nye stasjonen, seier Stein Gjøsund.

Den nye brannstasjonen kjem også til å få garasje til alle bilane, eigen verkstad for service, vask og vedlikehald, trimrom og badstove, eige strømaggregat og oppbevaringsstad for backup til Os kommune sin server.

Spennande? Vil du ha ukas høgdepunkt i innboksen?

Les meir om

Last ned Midtsiden-appen idag

No kan du følgja nyhende frå Os - rett i appen.

  • Gratis å lasta ned
  • Bli varsla straks noko skjer
  • Tilgjengeleg i App Store og Google Play Store
Last ned appen
For å få tilgang til alle sakene i appen må du vera abonnent.