– Ein trist dag for Os

Bli varsla om nye saker:
Følg Midtsiden på Facebook

– Eg er lei av vakuumpakka pålegg, men no er det for seint, sa Tom Fossengen då han kom innom Kleiven Kjøtt og Delikatesse på siste opningsdag laurdag.

– Eg har nok ikkje vore den største kunden, men eg har vore stolt av å seia at eg bur i Os for der har vi både slaktar og fiskeforretning. No stenger ein av dei og det er trist for Os.

På tilbodsjakt

Det var i mars i år at Hans Anton Kleiven fortalte at han ville legga ned. Butikken blei halden open ut mai og salet den siste veka viser at det ikkje er alle som er som Fossengen, lei av billig, vakuumpakka kjøtt.

– Då vi annonserte halv pris på tørrvarer storma folk til butikken. Desse siste dagane har folk spurt mykje om kor tid kjøttet kjem på tilbod, fortel innehavar Hans Anton Kleiven.

Å matcha dei store kjedane på pris har ikkje vore hovudutfordringa, meiner han. Opningstidene er det verre med.

– Når stadig fleire handlar seinare på kvelden har det blitt vanskeleg for oss å vera med i konkurransen. Arbeidskraft kostar.

Kort ferie

Hans Anton og kona Grethe er glade for alle blomane, korta og helsingane dei har fått den siste tida.

Dei minutta Midtsiden var innom kom tre personar innom berre for å ta dei to i handa.

– Sånn har det vore heile veka. Folk er veldig hyggelege, seier Hans Anton rørt.

På nokre av korta blir Kleiven ønskt lykke til med pensjonistlivet, men verken Hans Anton eller kona vil pensjonera seg.

– Vi er berre 56 og 52 år. No skal vi rydda ut av butikken og produksjonslokalet. Vi skal ha oss ei veke med ferie, men store delar av sommaren kjem nok til å gå med til å avslutta butikkdrifta formelt og til å selja produksjonsutstyret.

Bedrifta hadde fem tilsette og ekteparet Kleiven er blant dei som no vil ha seg ny jobb.

Kleiven eig framleis produksjonslokalet i Finnebrekka og bakre del av lokalet i Os sentrum.