Ein tung kveld i Oshallen

Bildeserie:

1 av 8

Etter 8 tap på 9 kampar tok Os i kveld imot botnlaget Stord.

– Vi rekna med at dei var like gira på å vinna som oss, og eg sa til jentene før start at denne kampen kunne bli avgjort på nettopp vilje, fortel trenar Gitte Torp.

Begge lag såg ut til å villa, og heimelaget fekk den beste starten. Os leia 2-0, blei forbigått til 4-5 og etter 6-6 kom 6 svake minutt.

Stord drog ifrå, og Os gjekk frå 6-6 til å ligga under 6-13.

– Vi har dessverre slike periodar i alle kampar, fortviler Gitte.

– Det blir framleis for mykje éin og éin i forsvar, og vi gjer framleis for mange feil i angrep. Desse resulterer ofte i rush imot, og då blir det fort mange baklengsmål.

Os - Stord 20-31 (8-17)
Os (med skåringar): Marlene Sund, Ann Kristin Lyssand, Benedicte Veseth 5, Bente Mjanger 4, Nora Johnsen 4, Nora Berge 2, Thiet Dang 2, Irmelin Lund 2, Line Hjelle Berentsen 1, Ayleen Hagen, Anna Mjånes, Regine Sten, Siri Horvei og Mia Nielsen.

9 mål blei for mykje å ta igjen. Os var, på det beste etter pause, 8 mål bak på stillinga 15-23, men tapte med 11.

Nokre lyspunkt blei det likevel.

Benedicte Smith Veseth hadde sin beste kamp for Os til no, og sette 5 mål i nota før ho fekk ein finger i auget i 2. omgang og måtte av banen.

Bente Mjanger er tilbake, og skåra 4 mål. Os missa på dei to første straffane, men Thiet Dang skåra eitt frå 7-metersmerket og Nora Johnsen sette tre.

Line Berentsen var sjuk, men spelte i starten og slutten av kampen. Mia Torp Nielsen fekk prøva seg litt i 2. omgang, for første gong etter operasjon i den eine foten.

Neste kamp for Os er først 9. januar. Då er det bortekamp mot Fyllingen, som ligg på 2. plass.

• Tabell og terminliste