– Ein veldig inspirerande tur

Politikarar, tilsette og tillitsvalde i kommunen har dei siste dagane vore i Tønsberg, Nøtterøy, Horten og Sande for å hausta erfaringar før dei startar prosjektering av den nye sjukeheimen og dei nye omsorgsbustadane på Luranetunet.

– Det blei ein nyttig og god tur, kor vi fekk presentert kva og korleis dei fire kommunane tenker. Det har gitt både styringsgruppa og prosjektgruppa eit felles utgangspunkt for den samfunnsoppgava vi står framfor.

– Vi fekk bygd gode relasjonar og forstår kvarandre godt i høve det vi no skal i gang med. Med ei så brei gruppe, som har såpass forskjellige utgangspunkt, så fekk vi masse artige diskusjonar. Noko som kan gjera at sluttproduktet blir endå betre.

– Eg trur vi har truffe veldig bra med korleis gruppene er satt saman, seier Nils-Petter Borge, kommunalsjef for helse, omsorg og beredskap i Os kommune.

Veldig obs på driftskostnadane

Éin ting er å skulla bygga sjukeheim med rundt 60 plassar og 40 til 60 nye omsorgsbustadar, men dei skal også driftast.

– Det er noko av det vi tek med oss etter turen.

– Kva har dei kommunane vi besøkte lykkast med og kva har vore mindre vellykka.

– Vi skal tenkja oss nøye om når vi byggjer, slik at vi skapar grunnlag for ei effektiv drift, fortel Borge.

Likt, men ulikt

Dei fire kommunane dei besøkte har organisert pleie- og omsorgstenesta si på litt ulikt vis.

– Alle har det same ansvaret, men veldig forskjellige utfordringar.

– Nokre har spreidd sjukeheimane på fleire plassar, andre har gjort meir som oss, og har samla tenestene på éin plass.

– Studieturen visar at vi på ein del områder har tenkt ganske rett, men vi fekk og nokre tips om korleis vi kan modernisera andre deler av tenesten, avsluttar kommunalsjefen.

Ein tek sikte på å leggja fram forslaget til utbygginga på Luranetunet til politisk handsaming tidleg på nyåret 2015 og at ein kan få anleggsstart i løpet av 2015.