Eit førebilete for andre
Bildeserie: Espira Kuventræ barnehage sin Forut-festival blir modell for barnehagar over heile landet. – Festivalen er ein snakkis, fortel Ingvar Midthun i Forut.
Bildeserie:
Torsdag arrangerte Espira Kuventræ barnehage festival for borna, søsken, foresatte, besteforeldre og andre interesserte. Alle inntektene frå loddsal, ansiktsmaling, svampekasting og mykje meir går til Forut sin barneaksjon.
– Vi har med omlag 1500 barnehagar og rundt 100 skular på barnefestivalen.
– Det er ingen som lagar noko så gøy, flott og fint som dei gjer her i Espira Kuventræ.
– No skal eg ta ein haug med bilete, og høyre meir om korleis dei planlegg festivalen, så vil vi nytta den som inspirasjon for barnehagar og skuler over heile landet i forkant av neste års aksjon, fortalte kampanje- og marknadssjef i Forut, Ingvar Midthun til Midtsiden, tydeleg imponert over barnehagen sitt arbeid.
– Alle i same båt
Inntektene frå årets aksjon går til landsbybarna i Bawatele i Malawi.
– Aksjonen handlar om mykje meir enn at vi her oppe i nord skal hjelpa barn i andre land.
– Barna har gjennom aksjonen fått kunnskap og innsikt i korleis livet til andre barn er i kvardagen.
– Vi ønskjer ikkje ein "vi og dei"-aksjon, men å synleggjera at vi alle er i same båt på same klode, forklarar Midthun.
Gratis helikoptertur
Karianne Moberg i Espira Kuventræ fortel at dei har lært om Lines som bur i Bawatele. Ho må gå ein halvtime for å henta vatn, og laga seg fotball av plastikkposar for å kunne leika og ha det gøy.
– Fotball er fotball, sjølv om ein nyttar plastikk for å sparke, meinte ungane då Karianne fortel.
Saman med lokalt næringsliv har Espira Kuventræ fått til ei rekkje av premiar.
– Nytt i år er mjølkespannholding. Den som held lengst vinn ein gratis helikoptertur, så her er det berre å testa styrken, helsa Karianne då ungane opna festivalen.
Totalt samla barnehagen inn omlag 35.000 kroner til Forut sin barneaksjon i løpet av dei par timane torsdag ettermiddag.