Eit minne for livet

Onsdag denne veka var cross-syklane parkert og køyredressen byta ut med findress og slips for ungdommane i Kjør for livet-klubben på Os.

Det var nemleg klart for julekonsert i ballsalen på slottet, og i handa på veg inn hadde dei ein invitasjon frå sjølvaste Kongen og Dronninga.

Det er ikkje fritt for at det var ein spent og forventningsfull gjeng ungdommar som med beundrande blikk gjekk inn gjennom dei store portane på slottet onsdag kveld.

- Denne invitasjonen skal eg ha med heim igjen og setja i glas og ramme.

På TV i kveld

Saman med vel 200 andre ungdommar var dei fem ungdomane og veilederane Kalle Pedersen og Jane Espeland eksklusivt invitert til konserten «Jul på Slottet» som sendast på NRK klokka 20.55.

- Vi i kongefamilien møter mange menneske på våre reiser rundt i landet, og mange av desse gjer sterke inntrykk på oss.

- Her i dag har vi invitert nokre av dei til konsert hos oss på slottet, helsa dronning Sonja i sin velkomst.

Saman med kongen, kronprins Haakon og borna Marius og Ingrid opplevde ho konserten saman med ungdomane.

På scenen sto artistar som Kurt Nilsen, Tuva Syvertsen og Ida Jenshus.

Ein minnerik kveld

Tidleg på formiddagen onsdag gjekk flyet frå Flesland til Gardermoen. Etter ei felles samling med fleire av prosjekta i Kronprinsparets Fond var det klart for å skifta til finstasen.

- Vi var vel alle spente på førehand.

- Det var ei oppleving eg kjem til å hugsa lenge. Det var ein fin konsert, fortel Chasmin.

Handhelsa på kongen

Då ungdomane gjekk inn til konserten sto kongefamilien i døra og tok kvar og ein i handa.

- Det var vel eigentleg som å helsa på Kalle, men det er klart – eg kjem nok til å hugsa dette så lenge eg lever, ja.

- Det er jo ikkje mange som er så unge som meg som får koma her og helsa på heile kongefamilien, fortel Kristoffer med eit smil.

Ønskjer seg verktøy

Konserten på slottet blei også ei avslutning på 2012, og det første halvåret i drift for Kjør for livet-klubben. Hausten har vore brukt til mykje kjøring og vore fylt med mange spennande aktivitetar. No i vinter er det forskjellege mekkeprosjekt som står p�� planen.

- Å få koma på slottet var jo ein flott julegåve, men vi har også fleire punkt på ønskelista vår til jul, fortel teamsjef Jane Espeland med eit smil.

- Om nokon har nok brukt verktøy eller eit spennande prosjekt dei vil gje vekk, så høyrer vi gjerne frå dei.

- Alle bidrag til å skapa god aktivitet set vi veldig stor pris på, avsluttar Espeland.