– Eit show for deg!

For to år sidan fylte sentrumsforeninga Kløvertun med 200 tilskodarar då dei inviterte til moteshow for å visa kva butikkane i sentrum har å by på.

– Det var etter den framvisninga ideen om at det hadde vore tøft å gjera noko i Oseana blei sådd.

– Etterkvart forma den lause ideen seg til at vi ville laga eit show basert på ei historie om kva eit par som etablerar seg, og bur i Os, kan finna i sentrum, forklarar Laila Moberg om bakgrunnen for showet dei inviterer til onsdag i neste veke.

Treng ikkje reisa til byen

Laila tok sjølv på seg oppgava å skriva historia, kor alle medlemsbedriftene i sentrum er involvert. Til å hjelpa seg med å sy det samen til eit heilheitleg show har ho fått med seg Lisa Nøttseter som regissør og Barbra Røttingen som fortellar/konfransier.

– Det var utruleg kjekt å bli spurt. Sjølvsagt ville vi vera med på dette, fortel dei to.

– Ein ting som slo meg då eg leste utkastet til historien frå Laila er at her har vi jo alt.

– Innbyggarane i Os treng ikkje reisa til byen for å handla. Vi har alt i vår eiga bygd.

– Det har vi lyst til å få fram i showet, fotel regissør Lisa Nøttseter.

Bli med på ei reise

Historia handlar om paret, i showet spelt av Jan Helge Kordts og Linda Nytræ frå Søre Neset-revyen.

– Dei blir på mange måter den raude tråden i showet, der dei nyttar seg av tilboda i sentrum, alt frå klesbutikkane med moter og trender, til røyrleggarar, jernvarer, interiør, banker og gullsmed.

– Vi vil visa at bygda er meir enn pizza og frisørar, som enkelte påstår, smiler Moberg.

I tillegg kjem C.J. Marvin og Hans Marius Johnsen som representanter for pianobaren på Solsiden og bluesen på Peppes.

– Vi har òg fått med oss "foredraghaldarar" frå DnB, Liv på Øyro og Torstein frå Haaheim gaard til å krydra framsyninga.

Mingling og gåver

Det er ikkje berre show Os sentrum inviterar til.

– På inngangbilletten, som er i sal hjå medlemsbedriftene i sentrum, blir det trekking av gåver frå butikkene.

– Eg er overvelda over bidraga som har kome inn, det er alt frå diamantring og årskort på Aktiv 365 til gåvekort i tusenkroners-klassen.

– Om folk vil sikra seg billett bør dei vera raske, mange har gjort det allereie, så det kan fort bli fullt.

– Etter showet legg vi opp til mingling, smaksprøver og moglegheiten til å få sjå nærare på butikkane sine utval i foajeen.

– I tillegg kan ein jo ta seg eit glas med noko godt saman med gode vener både før og etter showet, avsluttar Laila Moberg med eit smil.