Eksklusivt møte med ORBO

– Dette var nok første gong eg har spelt på denne måten, åleine med kassegitar for eit så ungt publikum, seier frontfigur i ORBO & The Longshots, Ole Reinert Berg-Olsen.

ORBO, som under plateslepp i Oseana i haust blei MOT-ambassadør, viste sjølv mot då han spelte gratiskonsert i ungdomsklubben.

– For det første er eg takksam for at ein artist av dette kaliberet tar seg tid til ein sånn konsert, på strak arm rett før jul. For det andre er eg imponert over at han stiller på denne måten, og at han fengsla ungdomen sånn som han gjorde, seier Kjetil Osablod Grønvigh frå kulturkontoret og Allakten.

God dialog

ORBO spelte to låtar frå det nye, kritikarroste albumet, Praire Sun, éi låt frå albumet Masquerade, og avslutta med Beatles-låta Can't buy me love.

– Innimellom låtane prata han med ungdomane, spurte om dei sjølv dreiv med musikk, fortalte om det å ha musikk som levebrød, om små historiar frå artistlivet og om då han spelte inn plate på hytta til Kurt Nilsen.

– Konserten blei ein stor suksess og vi kjem til å gjennomføra liknande arrangement også neste år, seier Grønvigh.

Jul på Ustaoset - romjulskonsert i Os

Ole sjølv synes det er flott at det finnest slike tilbod for ungdom i Os og seier dette er hans første MOT-oppdrag.

– Men eg tar gjerne fleire.

Det er ikkje lenge til neste gong ORBO speler i Os. Torsdag 29. desember stiller han og bandet, saman med fleire andre artistar, opp til dugnadskonsert til inntekt for Sigrid Tvedt sitt arbeid for ungdom i Os, og for oppfølgingssenteret Vindfanget.

Før neste konsert skal også Ole feira jul. Det gjer han på Ustaoset, saman med dottera Scarlet og andre i familien, i kvitare omgjevnadar enn her i Os.

Plateproduksjon og turné i USA

2012 kan bli travel for ORBO, som no også produserer plater. Han skal ut med album både for De Musikalske Dvergene og for Robert Smith Hald. Ole bidrar også som musikar på begge platene.

– Tilsvarande oppdrag trur eg det blir fleire av neste år.

Med ORBO & The Longshots blir det plateslepp i USA i januar og turné i USA i februar.

Både til sommaren og hausten 2012 er det allereie booka festivaljobbar.