Elektriske dagar på Nore Neset

Laurdag og søndag blir det motbakkeløp, aktivitetar, underhaldning og messe på Nore Neset.

Sjå bildeserie frå Osmessa 2013

Osmessahar utstillarar innan hus og hage, helse og sport, brukskunst og tenester – og bilar og andre kjøretøy, kjøretøy som nyleg blei lovleg i Noreg.

Frå 1. juli blei det opna for bruk av «sjølvbalanserande kjøretøy» i Noreg. Segway er eitt kjent varemerke, Gyroway, som Aase forhandlar, eit anna.

– Det har vore selt ein del til turistnæringa, som blant anna organiserer guida turar med desse. Men prisen er litt høg, så det har til no ikkje slått så veldig an, seier Bjørn Aase frå Safe-Way.no.

Aase tar likevel med seg nokre ståhjulingar til Osmessa. Men produktgruppa han har mest tru på er elsyklar, ein kategori som også fekk nytt regelverk i år.

Populær drahjelp

– Til no i år har eg selt 97 elsyklar, sa Aase til Midtsiden i august, i samband med produksjon av magasinet Midtsiden, som kjem i postkassane i Os i dag.

Syklar som gir hjelp opptil 25 km/t tel som sykkel, ikkje som kjøretøy med registreringsplikt og det som følgjer med.

– Ved sidan av fordelene du har med å bruke sykkel får du her drahjelp opp lange bakkar, eller på flat veg, om du ikkje vil bli alt for sveitt på veg til og frå jobb eller handletur. Eller om du av helsemessige årsaker ikkje kan bruka ein tradisjonell sykkel på dei turane du ønskjer å ta.

MX Sport Os, som også er utstillar, tar ikkje med elsyklar.

– Vi er rett og slett utselt. Gjennom vinteren kjem vi til å selja på bestilling, til neste sesong kjem vi til å ta inn langt fleire modellar å velja i, seier Lars Petter Grønvigh.

Større fokus på dei yngste – også på messa

Osmessa og Nore Neset Dagane har lenge hatt mykje å by på for dei unge. I år blir det ekstra mykje, også i messehallen.

– Barnas bruktmesse er nytt i år. Her er ein del av messehallen sett av til at ungar kan selja brukte leikar, klede og utstyr, og her er det ungane sjølv som har regien, fortel Karin Bøyum, dagleg leiar i Stiftelsen Nore Neset Aktivitetshus.

Hestar frå Trivselsstallen, varer og aktivitetar frå Lilleballong, fletter og «tatoveringar» er også del av messa og Nore Neset Dagane, saman med gatecupen, naturstien og klatreveggen.

Magi i Symrasalen

Mens modellbilar kjører rundt på utsida, musikkbingen blir opna og Switch skateklubb kjører oppvising i den nye skateparken skjer det også ting på scenen i Symrasalen.

– Eg liker å koma så tett på publikum at ungane føler at det er dei sjølv som tryllar, seier Andini.

Laurdag under Osmessa er det dukketeater i Symrasalen, søndag er det tid for trylling.

Det er teatergruppa Alveslottet som kjem med si mest populære framsyning, «Den lille larven Aldrimett». Denne er spesielt tilpassa dei aller yngste, frå 1 til 5 år, men mange i barneskulealder har også stor glede av denne forteljinga.

Anders Hindenes stiller som tryllekunstnar Andini på Nore Neset søndag. Der blir det magi, men også mykje morosamt.

– Eg er mykje klovn òg, det handlar først og fremst om at ungane skal ha det gøy. Eg liker å gjera triks der ungane deltar. Mot slutten skal vi prøva om vi klarer å trylla fram ein levande kanin, avslører Andini.