– Bruk av refleks kan vera avgjerande, seier politioverbetjent Anne Lyssand. (Foto: Trygg Trafikk)
– Bruk av refleks kan vera avgjerande, seier politioverbetjent Anne Lyssand. (Foto: Trygg Trafikk)

Er du ein mjuk og usynleg trafikant?

I dag er Refleksdagen. Her er 5 tips frå Trygg Trafikk.

Kjetil Vasby Bruarøy
15. oktober 2020 - 15:48

I dag blir Refleksdagen markert for 15. år på rad.

Generelt er norske fotgjengarar dårlege på refleksbruk, viser ei undersøking Trygg Trafikk og forsikringsselskapet Fremtinds har fått gjennomført.

– 8 av 10 meiner at refleks burde vore påbode, men berre 1 av 4 bruker refleks, seier Ann-Helen Hansen i Trygg Trafikk i ei pressemelding.

Bjørnafjorden kommune deler ut gratis refleksar i kundetorget både i Os sentrum og Eikelandsosen, fortel kommunen på sine heimesider.

– Eg er glad for å sjå at mange turgåarar og mosjonistar er flinke med å bruka refleks, og at mange bruker refleksvest, seier politioverbetjent Anne Lyssand.

– Men det er nok mange som kan bli flinkare, både av fotgjengarar, syklistar, folk på sparkehjul og ungdom på moped. God bruk av refleks kan vera avgjerande.

Trygg Trafikk kjem i dag med 5 reflekstips:

  1. Fest refleks på alle jakkar, sekkar og vesker – då har du alltid med deg refleks. 
  2. Refleks er mest synleg når den beveger seg. Fest refleks på armar og bein. 
  3. Bruk to eller fleire refleksar. Gjer deg synleg frå alle kantar. 
  4. Hengerefleksar bør henga i knehøgde for best effekt.
  5. Refleksvestar er forbruksvare som blir slitt over tid. Bytt ut gamle refleksvestar! 

 

Les meir om

Lokal Politi