Er du lei av "sommaren"?

Sommarvêret er nesten på same spor som i fjor, mindre regn, men grått og kaldt nok til at folk som hadde plan om å halda seg heime no blir svolten på sol og varme.

– Vi har ein del av dei spontane kundane no, dei som hadde plan om ferie på hytta, i båten eller heime i hagen, men som har bestemt seg for at dei vil ha litt sol og varme før ferien er over, seier Britt Halhjem hos Travelnet Os Reisebyrå.

Les òg: – Verda har blitt mindre

– Felles for fleire er at dei i tillegg til å vera seint ute har avgrensa tid dei kan reisa på. Det gjer det ekstra vanskeleg å finna tur, men vi har allereie fått billettar til fleire.

Stor kapasitet i Tyrkia

Mange av dei som er seine med Syden-bestillinga endar med å ta turen til Tyrkia.

– Kapasiteten hos turoperatørane har auka mykje på Tyrkia dei siste åra, så det er der det har vore lettast å finna plass.

Dagens oppdrag: Send ein schæfer til England

Medan mange vil til varmen er det andre som rett og slett berre ønskjer å få seg sjølv og reisefølgjet heim.

– Vi hadde ein britisk turist innom her med ein hund i dag. Han hadde reist til Noreg med bil og ferje via Nederland, men bilen havarerte på fjellet og han fekk problem med å få hunden heim.

Etter mykje papirarbeid og ordning med pass (!) til hunden fekk Os Reisebyrå bestilt billett til både mann og hund.

– Dei reiser på fredag, med kvar sitt fly, mannen som passasjer og hunden som kargo. Det blei ikkje billeg, men dei kjem seg heim igjen.

Kva som skjer med bilen blir andre sin kopp te.

Skepsis til Hellas?

Den økonomiske krisa i Hellas har ifølgje Halhjem ikkje fått folk til å spekulera i om ein får ekstra mykje for pengane på dei greske øyer.

– Snarare tvert imot, enkelte avisoppslag har fått folk til å bli litt skeptiske. Spesielt då det blei skrive om vanskar med minibankar og euro.

No er det meste til dei greske øyene likevel utselt, så den låge etterspurnaden har ikkje så mykje å seia.

– Det ser heller ikkje ut til å vera grunn til ikkje å reisa til Hellas, vi har ikkje fått nokre meldingar om tekniske problem knytt til krisa.

Fleire vil til Kroatia og USA

Dei som var litt tidlegare ute med bestilling av årets ferie landa gjerne i Kroatia eller USA.

– Vi har hatt veldig stor auke i reiser til USA dei siste åra. New York, Florida og California spesielt.

– Mange vil innom New York før dei reiser vidare til ein varmare stat, og vi ordner med fly, innanlands fly, leigebil og overnatting. Det er spennande og kjekke oppdrag, synes Kjersti Fjellvang.

Madeira til hausten?

Turoperatøren Vitaltour, som fyller 10 år i år,har i 2012 sin første sommar utan charterturar til Syden.

Les òg: 10 år på tur

Vitaltour har no spissa utvalet på pakkereiser og langtidsreiser utanom sommarsesongen, i tillegg til helse-/trivselsturar for grupper.

– Vi sel reiser til alle, men tilboda er best tilpassa vaksne som reiser utan ungar, til meir fredelege hotell, fortel dagleg leiar Inger Berit Bøyum.

Frå september går turane til Kypros og den idylliske kystbyen Terracina, éin time med tog vest for Roma.

Frå oktober og ut november går turane til Madeira. Også Lanzarote står på menyen.

– Madeira, som var nytt reisemål for oss i år, har vore ein stor suksess!

Vi har fem fine hotell på Madeira, frå 3- til 5-stjerners, med avreise frå Flesland kva torsdag frå 4. oktober.

– No har vi også utvida med eit vårprogram med turar til Madeira i heile mars og april. Då kan du få med deg den fine blomstringa øya er så kjent for.

Også langtidsreiser har det gått mykje av, anten ein vil bu 6 veker på Lanzarote i vinter eller inntil 6 månadar på Kypros haust, vinter eller vår.

Sjå òg: Midtsiden samleside, Reise