Fabelaktig fakkelfredag

Bildeserie:

1 av 16

Fredag ettermiddag blei det skikkeleg julestemning på Osøyro. Allereie klokka 1730 var det eit stort frammøte ved Oseana kor det blei servert gratis gløgg og peparkakar. Litt før klokka 18 satte næringssjef Daniel Skotheim fakkeltoget i marsj retning torget.

– Vi har delt ut alle dei 300 faklane vi hadde. Eg er rett og slett overvelda over frammøtet, fortel sentrumsleiar William Lindborg då Midtsiden møter han på taket av torgbygget medan slutten av toget nærmar seg.

Anslagsvis var det omlag tusen små og store som blei med.

Perfekte rammer

Med lys i lenkene og baldakinene. Ein kald, men vindstille, vinterkveld kor sjølv vêrgudane spelte på lag og sendte små snøfnugg ned mot dei frammøtte blei det ein perfekt ramme.

– Vi kunne ikkje ønskja oss meir. No håper eg berre vi har nok gåver frå nissen, sa Lindborg før han fekk hjelp av ungane til å telje ned for tenning av julelysa og etterkvart til å rope på nissefar og hjelparane.

Gav ein smakebit

Før det hadde dei frammøtte fått ein smakebit frå litt av programmet som Fonos stiller med i Oseana neste helg. Koret framførte fire songar før gangen rundt juletreet og torgbygget.

Sjå julelysa bli tent og høyr ein av songane frå Midtsiden direktesending på facebook.