Færre flyttar til Os

Kjetil Vasby Bruarøyfredag 21. aug. 2009 09:01

I 2. kvartal 2009 auka folketalet i Os frå 16.486 til 16.530, ein folketilvekst på 44, det lågaste kvartalsvise talet sidan 2. kvartal 2004.

Det låge talet skuldast i hovudsak låg grad av tilflytting.

51 blei fødd, 28 døydde, 32 flytta til Os frå eit anna land medan 3 flytta frå Os og ut av landet.

Berre 117 flytta til Os (innanlandsflytting), noko vi også må tilbake til 2. kvartal 2004 for å finna liknande lågt tal på (111).

Vekst i alle fylka
I 2. kvartal auka folketalet i Noreg med 13.400 til 4825.500 busette. Det har si orsak i eit fødselsoverskott på 6 400, og ei nettoinnflytting frå utlandet på 7.000. Alle fylka i landet opplevde folkevekst i 2. kvartal.

Færre innvandra
13 100 personar flytta frå utlandet til Noreg i 2. kvartal, medan 6 100 flytta frå Noreg til utlandet. Samanlikna med same kvartal i fjor var det 2 400 færre innvandringar og 550 fleire utvandringar, og flytteoverskottet på 7 000 blei dermed nesten 2 950 mindre enn førre året.

Flest frå Polen
Sjølv med ei mykje lågare innvandring enn tidlegare, er polske statsborgarar stadig den største gruppa utlendingar som kjem til Noreg.

Samanlikna med 2. kvartal i fjor kom det 45 prosent, eller 1 700 færre polske statsborgarar til Noreg i 2. kvartal i år. Nest størst nedgang var det blant tyskarar, 320 færre tyskarar innvandra i 2. kvartal i år samanlikna med same perioden året før.

I tillegg til polakkar, var det flest innvandringar av personar frå Sverige (1 160), Litauen (634) og Eritrea (575). Samanlikna med i fjor, auka innvandringa mest for dei med eritreisk statsborgarskap (400) og islandsk statsborgarskap (300).

Kjelde: SSB.no