Sånn såg torget ut under fakkelfredagen i fjor. I morgon er det meldt opphaldsvêr og 0-2 gradar. (Foto: Kjetil Vasby Bruarøy)

Fakkelfredag med ny vri

Statisk «tog» og kveldsopne butikkar i sentrum når julegrana og peparkakebyen skal visast fram.

Av: Kjetil Vasby Bruarøy

Laurdag blei julegrana på AMFI Os tent, fredag kveld er det Os sentrum sin tur.

Den tradisjonsrike fakkelfredagen blir utan tog i år.

– Vi tenner faklar, men har ikkje mannskap til å gjennomføra vandring. Eg håper faklane likevel vil vera med på å skapa stemning, seier Jeanett Borgen Kallekleiv.

Dermed er det oppmøte direkte på torget fredag ettermiddag, med utdeling av faklar klokka 17, tenning av lysa på grana klokka 17.30 og opning av peparkakebyen i Brugata klokka 18.

Peparkakebygda er i år i nytt lokale, der du ikkje berre kan sjå utstillinga gjennom glaset, men gå inn og sjå på bygningane.

– Stine Kobbeltvedt og Kristine Vangsnes Bøe frå kultureininga har vore kjempeflinke med mottak og montering av utstilling. Vi har fått mange flotte peparkakehus frå skular, barnehagar, SFO og privatpersonar.

Samtidig er ein tidlegare tradisjon tilbake, med kveldsopne butikkar.

– Mange av butikkdrivarane ser på dette meir som eit kulturarrangement enn ein handledag, men det blei heldigvis god oppslutnad om å halda ope utover kvelden, viss det er nokon som vil gå ærend etter at seremonien er over.

Fleire saker